Të shtëna me armë në një lokal të njohur në Prishtinë, dy persona të plagosur
Një incident i rëndë me armë zjarri ka ndodhur në orët e para të mëngjesit në Prishtinë, ku dy persona mbetën të plagosur pas të shtënave në lokalin e natës “Preview Bar”. Ngjarja ka ndodhur në rrugën “Ferid Curri”, rreth orës 02:30, kur janë dëgjuar të shtëna me armë zjarri.
Njësitë policore reaguan menjëherë dhe gjetën dy persona të lënduar: Adis Hoti, i cili u qëllua në shuplakën e dorës dhe në këmbë, dhe Blerim Hoti, i cili u plagos në këmbë.
Sipas personelit mjekësor, të dy ndodhen jashtë rrezikut për jetën. Fillimisht kanë marrë trajtim në Qendrën Klinike Universitare të Kosovës (QKUK), më pas janë transferuar në repartin e Ortopedisë për trajtim të mëtejshëm.
Si i dyshuar për rastin, në vendngjarje është arrestuar Bali Krasniqi. Në vendin e ngjarjes, policia ka sekuestruar dy armë zjarri dhe një gëzhojë. Hetimet po vazhdojnë për të sqaruar plotësisht rrethanat e incidentit.
Për shkak të gjendjes së disa personave të pranishëm, të cilët dyshohet se ishin nën ndikim të alkoolit, deri tani është intervistuar vetëm një dëshmitar.
Në vendngjarje kanë dalë njësitë hetimore, forenzika rajonale dhe prokurori kujdestar nga Departamenti për Krime të Rënda, i cili ka cilësuar rastin si “Vrasje në tentativë” dhe “Mbajtje në pronësi, kontroll ose posedim të paautorizuar të armëve”. Hetimet për zbardhjen e plotë të ngjarjes po vazhdojnë.