Tensionet në Lindjen e Mesme: Një valë e re sulmesh me raketa nga Irani drejt Izraelit
Sirenat e alarmit u dëgjuan në Izrael pak pas orës 04:00 të mëngjesit, pas një sulmi me raketa nga Irani, duke thelluar më tej tensionet mes dy vendeve. Sipas Forcave të Armatosura Izraelite (IDF), janë zbuluar raketa balistike të lëshuara drejt territorit izraelit, çka nxiti menjëherë aktivizimin e sistemeve të mbrojtjes ajrore.
“IDF zbuloi raketa të lëshuara nga Irani drejt territorit të Shtetit të Izraelit. Sistemet e mbrojtjes u aktivizuan për të kapur kërcënimin,” thuhej në një njoftim të publikuar në platformën Telegram.
Alarmi u hoq rreth 15 minuta më vonë, ndërsa deri tani nuk ka raportime për viktima apo dëme materiale. Ky është sulmi i dytë me raketa nga Irani kundër Izraelit që nga mesnata. Edhe në sulmin e mëparshëm, i cili ndodhi rreth dy orë e gjysmë më herët, nuk u raportuan pasoja në njerëz apo dëme të konsiderueshme.