“`html
SHBA dërgojnë komandot dhe Irani ofron shpërblim: Amerikanët dhe iranianët në garë për të gjetur pilotin e zhdukur të F-15
Forcat iraniane dhe ato amerikane vazhdojnë përpjekjet e tyre për të gjetur pilotin e zhdukur pas rrëzimit të një avioni F-15 amerikan mbi territorin iranian. Ky incident shënon përplasjen e parë ajrore direkte që nga fillimi i konfliktit.
Autoritetet iraniane u kanë bërë thirrje banorëve të jugperëndimit të vendit të ndihmojnë në gjetjen e pilotit, duke ofruar një shpërblim prej më shumë se 60.000 dollarësh për çdo informacion që mund të çojë në kapjen e tij.
Sipas Laurel Rapp, drejtoreshë e programit të Shteteve të Bashkuara dhe Amerikës së Veriut në Chatham House, shpëtimi i pilotit amerikan është “një mision vendimtar”. Ajo shtoi se kapja e tij nga Irani do të përfaqësonte një “çmim të madh” dhe do t’i jepte Teheranit një “kartë shumë të fuqishme” në negociatat e ardhshme, raporton BBC.
Nga ana tjetër, një komandant i lartë iranian deklaroi se forcat e vendit tani janë në gjendje të “gjuajnë” avionët amerikanë falë taktikave dhe pajisjeve të reja. Gjenerali i brigadës Alireza Elhami, komandant i Bazës së Përbashkët të Mbrojtjes Ajrore të Iranit, tha se humbja e avionit ishte rezultat i taktikave, përdorimit të pajisjeve moderne dhe inovacioneve në sistemet e mbrojtjes ajrore iraniane. Elhami nuk dha detaje mbi këto inovacione, duke shtuar vetëm se ato shkaktuan “konfuzion dhe çorientim midis armikut”, sipas agjencisë shtetërore të lajmeve IRNA dhe raportuar nga CNN.
Kjo ngjarje rrit tensionet në rajon dhe përbën një provë të rëndësishme për aftësitë e mbrojtjes ajrore të Iranit, ndërsa SHBA-ja përpiqet të sigurojë kthimin e pilotit të saj të zhdukur.
Çfarë dihet deri më tani për të dy aeroplanët?
Për F-15:
- Forcat amerikane kanë nisur operacione kërkim-shpëtimi për aeroplanin e rrëzuar.
- Njëri nga dy anëtarët e ekuipazhit është shpëtuar dhe po merr trajtim mjekësor nën kujdesin e autoriteteve amerikane.
- Për anëtarin tjetër të ekuipazhit ende nuk dihet asgjë.
- Një nga burimet konfirmoi se bëhet fjalë për një aeroplan të tipit F-15E Strike Eagle.
- Video të verifikuara nga CNN tregojnë disa aeroplanë ushtarakë që fluturonin në lartësi të ulët mbi provincën Khuzestan, në Iranin qendror, si pjesë e një operacioni të dukshëm kërkim-shpëtimi.
- Kjo shënon herën e parë që një aeroplan amerikan me ekuipazh rrëzohet mbi Iran gjatë këtij konflikti.
- Në fazat e para të luftës, tre aeroplanë F-15 u rrëzuan gabimisht në një incident “zjarri mik” nga mbrojtja ajrore e Kuvajtit.
Për A-10:
- Një A-10 Thunderbolt II, i njohur me nofkën “Warthog”, u godit nga Irani të premten, duke detyruar pilotin të hidhej me parashutë, sipas një zyrtari amerikan të informuar për ngjarjen.
- Piloti arriti ta nxjerrë aeroplanin jashtë territorit iranian para se të hidhej dhe më pas u shpëtua, tha zyrtari.
- Ushtria iraniane pretendoi se e kishte goditur aeroplanin, duke njoftuar se ai u rrëzua në Gjirin Persik pasi sistemet e mbrojtjes ajrore të Iranit e shënjestruan pranë Ngushticës së Hormuzit, raporton media shtetërore iraniane, duke cituar një deklaratë të zyrës së marrëdhënieve me publikun të ushtrisë.
“`