Trump: Gazetari që raportoi për pilotin e humbur në Iran rrezikon burgim
Presidenti i SHBA-së, Donald Trump, shfaqi shqetësim të theksuar lidhur me rrjedhjen e informacioneve në media rreth ekzistencës së një piloti të humbur në Iran, pas rrëzimit të një avioni luftarak F-15. Ai bëri deklarata të forta gjatë një konference për shtyp të mbajtur në Shtëpinë e Bardhë.
Trump nuk ngurroi të kërcënonte me burgim gazetarin përgjegjës për publikimin e lajmit, nëse ai refuzonte të zbulonte burimin e tij, duke e justifikuar këtë me “arsye sigurie kombëtare”. Presidenti amerikan theksoi se autoritetet iraniane nuk ishin në dijeni të humbjes së njërit prej pilotëve, dhe se rrjedhja e informacionit kishte vënë në rrezik operacionin masiv të nisur për kërkimin dhe shpëtimin e tij.
Trump deklaroi gjithashtu se SHBA i kishte dërguar armë protestuesve në Iran, por këto armë u vodhën nga “një grup specifik njerëzish”.
“Ne dërguam armë, shumë armë, të cilat duhej t’u kishin shkuar iranianëve në mënyrë që ata të mund të luftonin këta hajdutë,” – tha presidenti amerikan në margjinat e një ceremonie të organizuar për festën e Pashkëve në Shtëpinë e Bardhë. Ai shtoi: “E dini çfarë ndodhi? Njerëzit të cilëve ua dërguam i mbajtën për vete. Kështu që jam shumë i zemëruar me një grup të caktuar njerëzish dhe ata do të paguajnë një çmim të lartë për këtë.”
Më herët, Trump kishte akuzuar kurdët se kishin marrë armë të destinuara për protestuesit. Këto komente u bënë gjatë një bisede telefonike me një gazetar të Fox News, i cili më pas i transmetoi ato në rrjetin televiziv.