Trump: Do të pezulloj sulmet ndaj Iranit për dy javë nëse hapet Ngushtica e Hormuzit
Ish-presidenti Donald Trump ka njoftuar se është dakord të pezullojë sulmet ndaj Iranit për një periudhë dyjavore, me kusht që Republika Islamike të pranojë hapjen e plotë, të menjëhershme dhe të sigurtë të Ngushticës së Hormuzit.
Trump bëri këtë deklaratë në platformën Truth Social, duke shtuar se vendimi vjen pas bisedimeve me Kryeministrin e Pakistanit, Shehbaz Sharif, dhe Feldmarshal Asim Munir. Ata kishin kërkuar që ai të mos dërgonte forcën shkatërruese drejt Iranit.
“Bazuar në bisedat me Kryeministrin Shehbaz Sharif dhe Feldmarshal Asim Munir të Pakistanit, dhe ku ata kërkuan që unë të pezulloj forcën shkatërruese që do të dërgohet sonte në Iran, dhe me kusht që Republika Islamike e Iranit të bjerë dakord për HAPJEN E PLOTË, TË MENJËHERSHME dhe TË SIGURTË të Ngushticës së Hormuzit, unë pajtohem të pezulloj bombardimet dhe sulmet e Iranit për një periudhë prej dy javësh”, shkroi ai.
Trump shtoi se ky do të jetë një “ARMËPUSHIM i dyanshëm”. Ai argumentoi se të gjitha objektivat ushtarake janë përmbushur dhe tejkaluar, dhe se Shtetet e Bashkuara janë afër një marrëveshjeje përfundimtare për paqe afatgjatë me Iranin dhe paqe në Lindjen e Mesme.
Sipas Trump, Irani ka paraqitur një propozim prej 10 pikash, të cilin ai beson se mund të shërbejë si një bazë e realizueshme për negociata. Ai theksoi se pothuajse të gjitha pikat e mëparshme të mosmarrëveshjeve janë rënë dakord mes dy vendeve, dhe se periudha dyjavore do të mundësojë finalizimin dhe përmbushjen e marrëveshjes.
“Në emër të Shteteve të Bashkuara të Amerikës, si President, dhe gjithashtu duke përfaqësuar Vendet e Lindjes së Mesme, është një nder që ky problem afatgjatë është afër zgjidhjes. Faleminderit për vëmendjen tuaj ndaj kësaj çështjeje! President DONALD J. TRUMP”, përfundoi ai.