Franca drejt krizës energjetike? Rreth 18% e pikave të furnizimit përballen me mungesa të karburanteve
Mungesat në stacionet e karburantit janë përkeqësuar në të gjithë Francën, ku rreth 18% e tyre përballen me mungesë të të paktën një lloji karburanti, sipas Ministres së Energjisë, Maud Bregeon.
Kërkesa e shtuar për karburant, e nxitur nga çmimet e kufizuara, si dhe ndërprerjet në Lindjen e Mesme, të cilat kanë rritur kostot globale të energjisë, kanë kontribuar në këtë situatë. Sipas Bregeon, mungesat janë më të theksuara në pikat e karburantit të operuara nga kompania e madhe e energjisë TotalEnergies. Këto pika, që përbëjnë shumicën e stacioneve të prekura, kanë tërhequr më shumë klientë pasi kanë ofruar çmime nën nivelin e tregut.
TotalEnergies ka njoftuar se ka mbajtur një çmim kufi prej 1.99 € për litër për benzinën pa plumba gjatë muajit prill, ndërsa çmimi kufi për naftën është vendosur në 2.25 €, duke e sjellë atë më afër niveleve të tregut. Kompania më parë kishte paralajmëruar për një rritje të ndjeshme të trafikut në rrjetin e saj që nga marsi, duke sinjalizuar “tension lokal të furnizimit”, sidomos për naftën.
Autoritetet i kanë atribuar këto probleme më shumë vështirësive logjistike të lidhura me shpërndarjen e ngadaltësuar gjatë periudhës së festave, sesa mungesave të furnizimit në nivel kombëtar. Ata shprehen se shumica e stacioneve pritet të furnizohen plotësisht në ditët në vijim.
Megjithatë, rritja e çmimeve të naftës dhe benzinës ka sjellë kosto më të larta për bizneset dhe familjet, duke shkaktuar protesta në disa rajone të Francës. Shoferët e kamionëve dhe firmat e ndërtimit kanë bllokuar rrugët pranë Nantes, ndërsa peshkatarët në Korsikë kanë bllokuar portet. Këto veprime ngjallin kujtime të protestave të përhapura për çmimet e karburantit gjatë lëvizjes së Jelekëve të Verdhë në vitet 2018-2019.
Lufta në Lindjen e Mesme ka shtuar presionin mbi tregjet globale të energjisë, duke rritur çmimet e naftës dhe duke përkeqësuar koston e karburantit për konsumatorët anembanë botës. Konflikti ka ndikuar në rrjedhat përmes Ngushticës së Hormuzit, një rrugë kyçe që përbën rreth një të pestën e furnizimit global me naftë.
Bashkimi Evropian po përballet gjithashtu me pasojat e vendimit të tij për të ndërprerë lidhjet energjetike me Rusinë pas përshkallëzimit të konfliktit në Ukrainë, si dhe me kostot e politikave të tij të tranzicionit të gjelbër. Komisioni Evropian ka deklaruar se nuk do të ketë kthim te energjia ruse dhe se do të vazhdojë me heqjen graduale të plotë të lëndëve djegëse fosile nga Rusia deri në vitin 2027. Megjithatë, në fillim të këtij muaji, ai pezulloi planet për një ndalim të plotë të naftës ruse, për shkak të “zhvillimeve aktuale gjeopolitike”, siç i kanë cilësuar disa zyrtarë.