“`html
Rama nga Durrësi: Lufta ka dëmtuar Turqinë e Dubain, turistët e tyre do t’i marrim ne. Vijojmë me projektet në bregdet, parkime e fonde për kredi sociale
Kryeministri Edi Rama, gjatë një takimi me strukturat e Partisë Socialiste në qarkun e Durrësit, u pyet për situatën e turizmit këtë vit dhe pasojat e luftës në Lindjen e Mesme. Ai u shpreh se vendet që po e pësojnë nga konflikti mes Iranit, SHBA dhe Izraelit janë Dubai dhe Turqia.
Rama theksoi se, për pasojë, Shqipëria pritet të presë një numër më të madh turistësh këtë vit, duke ironizuar se “këtu ka sherr, por jo luftë”.
“Unë besoj se lufta i ka dëmtuar shumë miqtë tanë në Doha, Abu Dhabi dhe Dubai. Besoj se ka dëmtuar dhe Turqinë. Për fat të keq, kjo do të përkthehet në më shumë njerëz që do të vijnë në Shqipëri. Nuk ka arsye pse të ndikojë këtu, tek ne ka sherr, por jo luftë. Frika më e madhe është nafta, ju e patë vetë si kërceu çmimi. Doli, larg qoftë, tërmeti, erdhi pandemia, lufta në Ukrainë, kriza energjetike dhe tani kjo,” tha Rama.
Sa i takon investimeve në Bashkinë e Durrësit, Rama theksoi se, përveç ndërtimeve për parkime tokësore e nëntokësore dhe projektit të Portit të Jahteve, strehimi mbetet një ndër programet prioritare që do të vijojë.
“Do të krijojmë fondin e përgjithshëm dhe janë disa formula për të lehtësuar marrjen e shtëpive nga ata që janë në punë, kanë një pagë, por që prapë se marrin dot shtëpinë. Për këtë, shteti do të vendosë disa garanci bankare. Ndërkohë, kemi filluar me kredi me zero interes për mësuesit, punonjësit e policisë, ushtarakët. Këtë vit do ta zgjerojmë, kështu që kemi filluar këtë proces,” tha Rama.
Ai shtoi se Durrësi ka nevojë për investime dhe se do të bëhen edhe më shumë. Rama përmendi diskutimet me ministren e Financave dhe Ekonomisë, Anila Denaj, për parkimet tokësore e nëntokësore. Ai theksoi se problemet me Portin e Marinës janë zgjidhur dhe po punohet me ritëm, duke shtuar se ky projekt do të sjellë të ardhura të mëdha për Durrësin. Gjithashtu, ka dy projekte të mëdha në bregdetin e Durrësit me qëllim rritjen e atraksionit të qytetit.
Kryeministri foli edhe për sfidën e procedurave dhe politikave të strehimit, ku është vendosur një taksë prej 3% për strehimin. Ai u shpreh se Bashkia e Durrësit ka potencialin për të krijuar të ardhura nga lejet e ndërtimit. Rama vuri në dukje nevojën e madhe për strehim, duke shtuar se nuk do të lihet vetëm Tirana në këtë aspekt, ndërsa për Himarën, ku ka shumë projekte ndërtimi, nuk ka nevojë për strehim.
Ai rikthehet te fondi i përgjithshëm për strehimin dhe formulat për të lehtësuar marrjen e shtëpive nga personat që punojnë por nuk arrijnë të blejnë banesë, duke theksuar rolin e shtetit me garancitë bankare. Gjithashtu, ai ripërmendi programin e kredive me zero interes për grupet e caktuara profesionale, i cili do të zgjerohet këtë vit.
“`