“`html
Tarifat e shpërndarjes së energjisë, ERE: Ja nivelet nga 1 maji deri më 31 dhjetor 2026
Bordi i Entit Rregullator të Energjisë (ERE) ka vendosur të mbajë të pandryshuara tarifat e shpërndarjes së energjisë elektrike për periudhën 1 maj – 31 dhjetor 2026. Kjo do të thotë që nivelet aktuale do të vazhdojnë të aplikohen për të gjithë segmentet e konsumatorëve, si ata në tension të ulët ashtu edhe ata në tension më të lartë.
Sipas vendimit numër 103, datë 14 prill 2026, tarifat e shpërndarjes do të jenë si më poshtë:
- 6.42 lekë/kWh për konsumatorët në tension të ulët (0.4 kV)
- 3.99 lekë/kWh për tensionin e mesëm (6/10/20 kV)
- 1.55 lekë/kWh për tensionin 35 kV
Ky vendim sanksionon që këto nivele tarifore do të zbatohen pa ndryshime nga 1 maji deri në fund të vitit, duke zgjatur në praktikë regjimin tarifor të aplikuar edhe në muajt e parë të këtij viti.
Në vendimin e tij, Enti argumenton se të dhënat e paraqitura nga OSSH (Operatori i Sistemit të Shpërndarjes së Energjisë Elektrike) për vitin 2025 janë paraprake dhe parashikimet për vitin aktual bazohen gjithashtu tek këto të dhëna. Megjithatë, kompania publike duhet të marrë në konsideratë disa aspekte për përmirësim në vijim.
ERE thekson nevojën që OSSH sh.a. të ndërmarrë masa për përmirësimin e cilësisë dhe detajimit të informacionit të paraqitur për qëllime rregullatore. OSSH duhet të paraqesë në mënyrë të detajuar kostot operative dhe kapitale, të shoqëruara me shpjegime për luhatjet ndër-vjetore. Gjithashtu, duhet të ofrojë informacion të strukturuar mbi investimet e realizuara dhe ato të planifikuara, duke respektuar parimet e eficiencës dhe transparencës.
Në të njëjtën kohë, OSSH sh.a. duhet të paraqesë një analizë të përditësuar të parametrave financiarë, përfshirë koston e kapitalit (ËAÇ), në përputhje me kërkesat e Metodologjisë përkatëse.
Tarifat e shpërndarjes përbëjnë një komponent të rëndësishëm të çmimit final të energjisë, pasi mbulojnë kostot e rrjetit, mirëmbajtjes dhe investimeve. Mbajtja e tyre në të njëjtin nivel nuk sjell kosto shtesë në faturat e energjisë, të paktën për këtë zë.
Vendimi hyn në fuqi më 1 maj 2026 dhe do të zbatohet deri më 31 dhjetor 2026.
“`