Braçe: Call Center-at mashtrues dëmtojnë imazhin e vendit
Deputeti i Partisë Socialiste, Erion Braçe, ka reaguar nga foltorja e Kuvendit lidhur me hetimet ndaj aktiviteteve të call center-ave mashtrues në Shqipëri, pas aksionit të fundit të autoriteteve ndaj një rrjeti të tillë disa ditë më parë.
Në fjalën e tij, Braçe theksoi se ky fenomen nuk është i ri, duke u shprehur se: “Aktiviteti i call center-ave apo atyre të tregut valutor (Forex) në vendin tonë është një aktivitet i hershëm. Pikërisht për këtë arsye, në Komisionin e Ekonomisë jam detyruar të kërkoj shpjegime nga autoritetet, veçanërisht nga Autoriteti i Mbikëqyrjes Financiare (AMF), Agjencia e Parandalimit të Pastrimit të Parave dhe Policia e Shtetit.”
Ai bëri të ditur se vetëm dy muaj më parë ka kërkuar një angazhim më të gjerë institucional: “Kam kërkuar të zhvillohet një seancë e përbashkët që të përfshijë AMF, Drejtorinë e Përgjithshme të Tatimeve, Policinë e Shtetit dhe Sektorin e Krimit Kibernetik, me qëllim goditjen e këtij fenomeni në territorin e Shqipërisë.”
Sipas deputetit socialist, ky aktivitet ka qenë në vëmendjen e institucioneve shqiptare, por ai theksoi qartë se përgjegjësia nuk është shtetërore: “E them me plot bindje se ky nuk është krim shtetëror, por veprimtari e individëve që mashtrojnë qytetarët evropianë nga territori i Shqipërisë.”
Braçe kërkoi një reagim më të fortë nga agjencitë ligjzbatuese, duke nënvizuar ndikimin negativ që këto aktivitete kanë në imazhin e vendit: “Ajo që duhet kërkuar me forcë është që agjencitë ligjzbatuese të merren me këtë fenomen dhe ta godasin, sepse ai turpëron dhe dëmton imazhin e Shqipërisë në raport me qytetarët e Bashkimit Evropian, të cilët kanë treguar bujari ndaj këtij vendi që nga viti 1991.”
Në fund, ai kritikoi edhe mënyrën se si trajtohen publikisht këto ngjarje: “Mënyra si paraqiten ngjarjet këtu është edhe abuzive, si histori e denjë për Hollivudin, që ka bërë filma për këtë fenomen. Unë nuk kam ndërmend të merrem me filma. Në këtë sallë do merrem me faktet nga fillimi në fund.”