Situatë shqetësuese: BE-ja aplikacion për verifikimin e moshës në internet për mbrojtjen e të miturve
Bashkimi Evropian ka njoftuar se një aplikacion i ri për verifikimin e moshës është gati nga ana teknike. Ky aplikacion është projektuar për të përmbushur rregullat e rrepta digjitale të BE-së.
Presidentja e Komisionit Evropian, Ursula von der Leyen, ka deklaruar se ky mjet do t’u mundësojë përdoruesve të dëshmojnë moshën e tyre në internet pa ndarë të dhëna personale.
Si funksionon?
- Pasi të jetë hedhur në treg, përdoruesit do të mund ta shkarkojnë aplikacionin dhe ta konfigurojnë atë duke përdorur një dokument identifikimi, siç është pasaporta ose karta e identitetit.
- Më pas, ata mund ta përdorin këtë aplikacion për të konfirmuar se janë mbi një moshë të caktuar kur duan të hyjnë në faqe me përmbajtje të kufizuara, duke ruajtur anonimatin e tyre.
Komisioni sqaron se sistemi është i ngjashëm me certifikatat digjitale të përdorura gjatë pandemisë COVID-19, të cilat u lejonin njerëzve të provonin statusin e tyre të vaksinimit.
Aplikacioni pritet të mbështesë zbatimin e Ligjit për Shërbimet Digjitale, i cili synon të rregullojë më mirë platformat online. Kjo përfshin kufizimin e aksesit në përmbajtje të tilla si pornografia, lojërat e fatit dhe shërbimet që lidhen me alkoolin.
Zyrtarët theksojnë se aplikacioni do të jetë “plotësisht anonim” dhe i ndërtuar mbi teknologji open-source, që do të thotë se mund të adoptohet edhe jashtë Bashkimit Evropian.
Siguria e fëmijëve në rrjetet sociale në fokus
Presioni për të ndërmarrë masa në nivel evropian u rrit pasi Australia vendosi ndalimin e përdorimit të rrjeteve sociale nga të miturit nën moshën 16 vjeç. Disa vende të BE-së po shqyrtojnë tani vendosjen e kufijve minimalë të moshës për përdorimin e rrjeteve sociale. Megjithatë, deri tani nuk ka pasur një mjet të besueshëm verifikimi që përmbush standardet e rrepta të BE-së për mbrojtjen e të dhënave.
“Kur bëhet fjalë për sigurinë e fëmijëve në internet, situata është jashtëzakonisht shqetësuese,” tha Ursula von der Leyen. Ajo përmendi “scrolling”-un pa pushim, përmbajtjen shumë të personalizuar dhe videot e shkurtra, të cilat sipas saj mund të krijojnë varësi dhe të jenë të dëmshme për përdoruesit e rinj.
Edhe pse ende nuk ka një ligj detyrues në të gjithë BE-në, Parlamenti Evropian ka bërë thirrje për një moshë minimale prej 16 vjeç për akses në rrjetet sociale. Për momentin, zbatimi i këtyre rregullave do të mbetet kryesisht në dorë të shteteve anëtare, por aplikacioni i ri synon të ndihmojë platformat të përputhen me rregullat e ardhshme kombëtare dhe të BE-së.