Sot mbahen zgjedhje të parakohshme në Bullgari, të tetat brenda pesë viteve të fundit.
Sipas sondazheve, favorit në këto zgjedhje është ish-presidenti i Bullgarisë, Rumen Radev. Radev ka premtuar një fillim të ri për Bullgarinë nëse koalicioni i tij i qendrës së majtë, “Bullgaria Progresive”, arrin të fitojë zgjedhjet.
“Bullgaria Progresive paraqitet si një alternativë ndaj kartelit të korruptuar të partive të vjetra, të cilat na sulmojnë me taktika të pandershme. Qëllimi ynë në zgjedhjet e ardhshme është të sigurojmë një shumicë të plotë”, ka deklaruar Rumen Radev, kandidat për kryeministër.
Në fushatën politike u diskutua edhe humbja e Orbanit në Hungari. Ish-kryeministri Bojko Borisov e quajti Radevin si një “Viktor Orban të ri”.
“Viktor Orbán është një antikomunist dhe një mik që ka arritur shumë, por dallimet mes nesh janë të konsiderueshme. Tani kemi një ‘Viktor Orbán të ri’ këtu, në personin e Rumen Radev, dhe nuk është rastësi që ministri i jashtëm i Hungarisë e vizitoi atë fshehtas”, ka thënë Bojko Borisov nga GERB.
Analistja Evelina Slavkova shprehu mendimin se Radev nuk ka gjasa të përpiqet të orientojë Bullgarinë më shumë drejt Rusisë. Megjithatë, ajo kritikoi Radevin për mungesën e sqarimeve më precize mbi këtë çështje gjatë fushatës.
“Vendi ynë ka pasur sukses, pavarësisht të gjitha pengesave dhe mosmarrëveshjeve nga disa politikanë, të krijojë një paketë shumë të rëndësishme mekanizmash që e mbajnë Bullgarinë në drejtimin e duhur. Anëtarësimi i Bullgarisë në NATO dhe në Bashkimin Europian, si dhe pjesëmarrja në Eurozonë dhe në Zonën Shengen, janë mjete që na mundësojnë të jemi shumë më të qetë”, ka theksuar Evelina Slavkova, analiste.
Zgjedhjet e parakohshme në Bullgari vijnë pas dorëheqjes së një qeverie konservatore, e cila u përball me protesta kundër korrupsionit në dhjetor të vitit të kaluar. Që nga viti 2021, kur dha dorëheqje kryeministri i atëhershëm Bojko Borisov, asnjë qeveri nuk ka mbijetuar më shumë se një vit. Kjo situatë ka çuar në rritjen e mosbesimit ndaj institucioneve, apati të votuesve dhe ulje të pjesëmarrjes në zgjedhje.