Emiratet e Bashkuara Arabe dalin nga OPEC dhe OPEC+, duke rritur tensionet energjetike dhe përçarjet në Gjirin Persik.
Emiratet e Bashkuara Arabe kanë njoftuar tërheqjen e tyre nga OPEC dhe OPEC+. Ky vendim ka implikime të rëndësishme gjeopolitike dhe ekonomike, veçanërisht në një kohë kur tregjet globale të energjisë po përballen me trazira të forta.
Sipas Reuters, largimi i njërit prej anëtarëve kryesorë pritet të ndikojë ndjeshëm në funksionimin e organizatës. OPEC ka përballur prej kohësh mosmarrëveshje të brendshme mbi nivelet e prodhimit dhe strategjinë gjeopolitike, sidomos me Arabinë Saudite, e cila konsiderohet si lideri de facto i grupit. Ky zhvillim vjen në një moment kritik, ku eksportet e naftës nga Gjiri Persik po hasin vështirësi për shkak të kufizimeve në lundrim në Ngushticën e Hormuzit, zonë kyçe për rreth 20% të furnizimit global me naftë dhe gaz natyror të lëngshëm. Këto pengesa janë pasojë e kërcënimeve dhe sulmeve të fundit nga Irani.
Vendimi i Abu Dhabit shihet gjithashtu si një zhvillim që forcon indirekt pozicionin e presidentit të SHBA-së, Donald Trump, i cili ka qenë kritik ndaj OPEC-ut për ndikimin në çmimet e naftës. Trump ka lidhur mbështetjen ushtarake amerikane për vendet e Gjirit me politikat e tyre energjetike.
Në planin rajonal, tërheqja e Emirateve pasqyron gjithashtu tensionet në rritje mes vendeve arabe. Këshilltari diplomatik i presidencës së Emirateve, Anwar Gargash, ka kritikuar publikisht atë që e cilësoi si mungesë mbështetjeje politike dhe ushtarake nga shtetet e Gjirit gjatë sulmeve iraniane. Ai theksoi se qëndrimi i Këshilli të Bashkëpunimit të Gjirit ka qenë “historikisht i dobët”, duke nënvizuar përçarjet në rritje brenda aleancës rajonale, në një moment delikat për sigurinë dhe ekonominë e rajonit.