“`html
Qeveria investon 7 milionë euro kapital për “Albanian Digital Solution”
Gjatë mbledhjes së fundit të Këshillit të Ministrave, qeveria shqiptare miratoi transferimin e një fondi prej 700 milionë lekësh (afro 7 milionë euro) për t’u përdorur si kapital fillestar për shoqërinë aksionare shtetërore “Albanian Digital Solution”, sh.a., me NIPT M61615021U.
Ky fond do të përballohet nga buxheti i Agjencisë Kombëtare të Shoqërisë së Informacionit (AKSHI) për vitin 2026, në zërin “Shpenzime kapitale”, sipas vendimit të qeverisë.
“Albanian Digital Solution” sh.a. është një shoqëri aksionare shtetërore, themeluar nga AKSHI, e cila është edhe aksionar i vetëm. Kompania, e regjistruar më 14 prill 2026, ka një kapital themeltar prej 700 milionë lekësh dhe si administrator ka Saimir Kapllani. Objekti kryesor i veprimtarisë së saj është zhvillimi, operimi, mirëmbajtja dhe mbështetja teknike e sistemeve, platformave dhe shërbimeve digjitale.
Referenca ligjore kryesore për krijimin e kësaj shoqërie është ligji nr. 43/2023 “Për qeverisjen elektronike”. Ky ligj rregullon organizimin, funksionimin dhe zhvillimin e sistemeve të informacionit dhe shërbimeve elektronike në Republikën e Shqipërisë, duke caktuar AKSHI-n si autoritetin qendror përgjegjës për koordinimin, standardizimin dhe sigurinë e tyre.
Ndryshimet e fundit në ligjin për qeverisjen elektronike i kanë dhënë AKSHI-t të drejtën të krijojë ose të marrë pjesë në shoqëri të posaçme të teknologjisë së informacionit dhe komunikimit (TIK). Këto shoqëri shërbejnë si struktura operacionale për zhvillimin, mirëmbajtjen dhe administrimin e sistemeve dhe platformave digjitale, duke përfaqësuar një ndarje funksionale midis rolit strategjik të shtetit dhe zbatimit teknik të projekteve digjitale.
“Albanian Digital Solution” do të veprojë si një instrument operacional i shtetit për të menaxhuar në mënyrë më të specializuar dhe fleksibël zhvillimin e infrastrukturës digjitale publike. Ndërsa AKSHI ruan përgjegjësinë për politikat, standardet dhe kontrollin institucional, shoqëria do të marrë përsipër funksionet teknike, si ndërtimi dhe mirëmbajtja e sistemeve, si dhe ofrimi i shërbimeve digjitale për institucionet publike.
Krijimi i kësaj shoqërie vjen në një periudhë kur AKSHI është përfshirë në hetime nga SPAK për dyshime për abuzime me fondet publike, favorizim në tendera dhe parregullsi në kontratat për shërbimet dhe infrastrukturën digjitale. Këto hetime janë fokusuar në mënyrën e prokurimit të sistemeve dhe platformave, si dhe në marrëdhëniet me operatorët privatë të sektorit TIK. Në të njëjtën kohë, publiku dhe sidomos bizneset, kanë hasur vështirësi në aksesimin e shërbimeve publike të ofruara nga platforma E-Albania, e cila menaxhohet nga AKSHI.
“`