“`html
Bizneset po kërkojnë dhe po marrin më shumë kredi
Kërkesa për kredi në sektorin bankar u rrit ndjeshëm në gjysmën e parë të këtij viti, ndërkohë që paralelisht u përmirësua edhe shkalla e miratimit të aplikimeve nga bankat.
Sipas informacionit të Bankës së Shqipërisë, bankat raportuan se morën gjithsej 90,380 aplikime për kredi në gjashtëmujorin e parë të këtij viti. Numri total i aplikimeve për kredi të shqyrtuara nga bankat është rritur me rreth 23%, si krahasuar me gjashtëmujorin e kaluar, ashtu edhe me të njëjtën periudhë të një viti më parë.
Kjo ecuri është mbështetur kryesisht nga rritja e kërkesës për financim nga individët dhe ndërmarrjet e vogla dhe të mesme (NVM). Konkretisht:
- Numri i aplikimeve nga individët është rritur me 22.2% krahasuar me gjashtëmujorin e dytë të vitit 2025 dhe me 20.3% krahasuar me një vit më parë.
- Aplikimet nga NVM janë rritur përkatësisht me 42.3% dhe 80.3%.
Në të kundërt, numri i aplikimeve nga kategoria “ndërmarrje të tjera” (përgjithësisht ndërmarrjet e mëdha) ka shënuar një rënie të lehtë prej 0.6% në terma gjashtëmujorë, por mbetet 7.4% më i lartë krahasuar me të njëjtën periudhë të vitit të kaluar.
Nga aplikimet e marra në shqyrtim gjatë periudhës, 30.4% janë refuzuar nga bankat. Norma e refuzimit ka pësuar rënie krahasuar me nivelin prej 31.6% në gjysmën e dytë të vitit të kaluar. Norma më e lartë e refuzimit paraqitet tek aplikimet për kredi të individëve (32.4%), pastaj vijon ajo për NVM (12.7%) dhe vlera më e ulët e normës së refuzimit shfaqet për ndërmarrjet e tjera (të mëdha) me 2.6%.
Krahasuar me gjashtëmujorin e kaluar, norma totale e refuzimit ka rënë me 1.1 pikë përqindjeje, ndërsa mbetet vetëm 0.5 pikë përqindjeje më e lartë se një vit më parë. Rënia e normës së refuzimit është vërejtur në të tre segmentet e klientëve, por ka qenë më e theksuar në rastin e NVM, ku treguesi ka zbritur me 2 pikë përqindjeje krahasuar me gjashtëmujorin e kaluar. Gjithashtu, norma e refuzimit është ulur edhe për individët dhe për kategorinë “ndërmarrje të tjera”, me përkatësisht 1.1 dhe 0.9 pikë përqindjeje. Këto zhvillime sugjerojnë një lehtësim të moderuar të normës së refuzimit në nivel sistemi.
Në bankat me kapital vendas:
- Norma e përgjithshme e refuzimit është rritur në 11.1%, nga 8.0% në gjashtëmujorin e kaluar dhe 9.1% një vit më parë. Kjo ecuri është ndikuar kryesisht nga rritja e normës së refuzimit në segmentin e individëve, ku treguesi është rritur në 12.3% (nga 8.7% në gjashtëmujorin e kaluar), si dhe nga një rritje më e lehtë në segmentin e NVM, në 7.8% (nga 7.1%).
- Në të kundërt, norma e refuzimit për kategorinë “ndërmarrje të tjera” ka rënë në 2.8%, duke konfirmuar vijimin e mbështetjes së këtij segmenti.
Në bankat me kapital të huaj:
- Norma e përgjithshme e refuzimit ka mbetur pothuajse e pandryshuar, në 38.3%, kundrejt 38.2% në gjashtëmujorin e kaluar. Megjithatë, zhvillimet ndryshojnë sipas segmenteve të klientëve.
- Norma e refuzimit për NVM ka rënë në 19.4%, nga 21.3% në gjashtëmujorin e kaluar dhe 20.2% një vit më parë, duke sinjalizuar një lehtësim të qëndrimit kreditues ndaj këtij segmenti.
- Norma e refuzimit për individët ka mbetur pothuajse e pandryshuar, në 39.8%.
- Për kategorinë “ndërmarrje të tjera”, norma e refuzimit ka zbritur lehtë në 2.4%.
“`