Përplasjet mes Merz dhe Trump: Sinjal alarmi për Gjermaninë, në pikëpyetje prania ushtarake amerikane
Përplasja mes Friedrich Merz dhe Donald Trump duket se po ashpërsohet. Trump tani kërcënon të reduktojë praninë e trupave amerikane në Gjermani, me një vendim që pritet të merret “së shpejti”.
Ky nuk është kërcënimi i parë i Trump. Sipas presidentit amerikan, Shtetet e Bashkuara po shqyrtojnë një reduktim të mundshëm të trupave në Gjermani. Njoftimi vjen pas kritikave të ashpra të Trump ndaj kancelarit gjerman Merz, pasi ky i fundit kishte shprehur rezervat e tij për ofensivën amerikane kundër Iranit.
“Ai nuk ka asnjë ide se për çfarë po flet!”, shkroi Trump në platformën e tij Truth Social, duke shtuar se “nuk është çudi që Gjermania po ecën kaq keq, si ekonomikisht ashtu edhe në aspekte të tjera”. Trump e akuzoi Merz se pranon që Irani të zotërojë armë bërthamore, megjithatë, nuk dihet që Merz të ishte shprehur ndonjëherë në këtë mënyrë.
Sipas të dhënave të ushtrisë amerikane nga muaji prill, rreth 86,000 ushtarë janë të dislokuar në Evropë, prej tyre afërsisht 39,000 në Gjermani. Ky numër ndryshon rregullisht, edhe për shkak të rotacioneve dhe stërvitjeve.
Merz përpiqet të qetësojë situatën
Deklaratat e fundit të Trump, lënë të kuptosh se marrëdhënia personale mes tij dhe Merz ka arritur në një pikë të re të ulët. Megjithatë, kancelari gjerman e kundërshtoi këtë përshtypje të mërkurën.
“Marrëdhënia personale mes presidentit amerikan dhe meje – të paktën nga këndvështrimi im – mbetet e mirë dhe e pandryshuar”, tha ai. “Ne vazhdojmë të jemi në komunikim të mirë me njëri‑tjetrin.”
Për muaj të tërë, kancelari federal dhe presidenti amerikan kishin kultivuar një marrëdhënie relativisht të mirë. Së fundmi, megjithatë, Merz ndryshoi tonin dhe kritikoi hapur Uashingtonin. Ai akuzoi qeverinë amerikane se nuk ka një strategji daljeje për luftën me Iranin.
“Amerikanët, sipas tij, kanë hyrë në këtë luftë “qartazi pa asnjë strategji””, tha Merz gjatë një diskutimi me nxënës në Marsberg, në rajonin Sauerland. Kjo e bën edhe më të vështirë përfundimin e konfliktit. “Sidomos kur iranianët duket se po negociojnë shumë me zgjuarsi – ose po aq me zgjuarsi nuk negociojnë fare,” tha Merz. “Këtu po poshtërohet një komb i tërë nga udhëheqja shtetërore iraniane.”
Trump ka kërcënuar edhe më parë
Gjatë mandatit të parë (2017–2021), Donald Trump kishte paralajmëruar një reduktim të kontingjentit të trupave amerikane në Gjermani. Disa muaj përpara largimit nga Shtëpia e Bardhë, Trump njoftoi se synonte të tërhiqte 12,000 nga rreth 35,000 ushtarë amerikanë që ndodheshin atëherë në Gjermani. Disa mijë prej tyre duhej të zhvendoseshin brenda Evropës, të tjerë të ktheheshin në SHBA.
Trump e përshkroi atëherë këtë plan si ndëshkim për, sipas tij, shpenzimet shumë të ulëta të Gjermanisë për mbrojtjen. Pasardhësi i tij, Joe Biden, i ndaloi këto plane menjëherë pas marrjes së detyrës.