Rikthehet Maratonën Ndërkombëtare e Palestinës: Simbol Rezistence dhe Shprese
Edicioni i 10-të i Maratonës Ndërkombëtare të Palestinës ka mbledhur palestinezë dhe vrapues nga e gjithë bota, duke u zhvilluar pas një pauze dyvjeçare shkaktuar nga konflikti mes Izraelit dhe Hamasit. Ngjarja nisi të premten në Betlehem, ndërsa një garë simbolike u organizua paralelisht edhe në Rripin e Gazës.
Maratona kryesore, me gjatësinë zyrtare prej 42.195 kilometrash, filloi në orët e para të mëngjesit nga afërsia e Kishës së Lindjes, në qendër të Betlehemit. Pamjet e shpërndara nga mediat ndërkombëtare treguan pjesëmarrjen e personave me aftësi të kufizuara, të cilët janë prekur nga lufta. Pjesëmarrja e tyre e shndërroi ngjarjen në një simbol të fortë rezistence dhe shprese.
Itidal Abdul Ghani, koordinatorja e maratonës, theksoi për agjencinë Anadolu se mesazhi kryesor i këtij viti ishte “uniteti i atdheut”.
Në kuadër të manifestimit, u zhvillua edhe një garë 5 kilometrash në Gazën qendrore, duke filluar nga Ura Wadi Gaza drejt veriut.
Organizatorët organizuan gjithashtu një maratonë virtuale, e cila u zhvillua nga data 17 deri më 21 prill. Kjo garë virtuale mblodhi më shumë se 5,000 pjesëmarrës nga 88 vende të ndryshme të botës.
Sipas të dhënave të organizatorëve, numri total i pjesëmarrësve në të gjitha aktivitetet e lidhura me maratonën tejkaloi 13,000 persona. Konkretisht, në Gaza morën pjesë 2,523 vrapues, ndërsa rreth 1,000 pjesëmarrës ishin të huaj nga 75 shtete.