Fenomeni ‘Super El Niño’ pritet të jetë më i forti ndonjëherë, duke sjellë përmbytje dhe thatësira
Organizata Botërore Meteorologjike ka lëshuar një paralajmërim se fenomeni klimatik ‘El Niño’ mund të rikthehet këtë vit në një formë më të fortë se zakonisht. Sipas organizatës, ky fenomen mund të sjellë temperatura rekord dhe mot ekstrem në shumë vende të botës.
Parashikimet tregojnë se fenomeni pritet të zhvillohet gradualisht gjatë muajve në vijim, ndërsa temperaturat e Oqeanit Paqësor po rriten me shpejtësi. Ekspertët paralajmërojnë se një ‘El Niño’ i fortë mund të shkaktojë valë të mëdha të të nxehtit, thatësira të zgjatura dhe përmbytje intensive në rajone të ndryshme.
Ky fenomen natyror, që shfaqet zakonisht çdo dy deri në shtatë vjet, ndikon drejtpërdrejt në shpërndarjen e nxehtësisë në planet dhe ndryshon modelet globale të reshjeve. Shkencëtarët theksojnë se ndryshimet klimatike dhe ngrohja globale mund ta bëjnë ndikimin e tij edhe më të ashpër në vitet e ardhshme.