“`html
Guvernatori i Bankës së Austrisë: Efektet e krizës gjeopolitike në ekonominë europiane do të jenë më të kufizuara
Guvernatori i Bankës Kombëtare të Austrisë, Martin Kocher, zhvilloi sot një vizitë zyrtare në Bankën e Shqipërisë, duke theksuar forcimin e bashkëpunimit ndërinstitucional mes dy bankave qendrore. Sipas njoftimit zyrtar të Bankës së Shqipërisë, kjo vizitë, në kuadër të procesit të integrimit evropian, shënon një moment të rëndësishëm në thellimin e marrëdhënieve dypalëshe.
Ky ishte takimi i parë zyrtar i Guvernatorit Martin Kocher në Shqipëri. Vizita filloi me një takim dypalësh në ambientet e Bankës së Shqipërisë, nën drejtimin e Guvernatorit Sejko. Gjatë takimit u diskutuan zhvillimet ekonomike dhe financiare, si edhe çështje me interes të përbashkët për sektorin bankar dhe bashkëpunimin rajonal.
Guvernatori Sejko falënderoi Guvernatorin Kocher për vizitën dhe vlerësoi marrëdhëniet e ngushta ekonomike dhe financiare mes Shqipërisë dhe Austrisë. Ai theksoi rolin e rëndësishëm të investimeve austriake në zhvillimin dhe modernizimin e ekonomisë shqiptare, veçanërisht në sektorin financiar. Austria u cilësua si një partner i rëndësishëm ekonomik dhe një mbështetëse e fortë e procesit të integrimit evropian të Shqipërisë. Guvernatori Sejko evidentoi kontributin e institucioneve financiare austriake në Shqipëri si një shembull i suksesshëm bashkëpunimi dhe si faktorë për zhvillimin e ndërmjetësimit financiar dhe promovimin e praktikave bankare moderne.
Duke iu referuar zhvillimeve ekonomike në vend, Guvernatori Sejko theksoi se ekonomia shqiptare ka vijuar të shfaqë qëndrueshmëri dhe performancë pozitive, pavarësisht sfidave të mjedisit ndërkombëtar. Ai shtoi se zgjerimi i aktivitetit ekonomik mbështetet nga konsumi, investimet, turizmi dhe një sektor bankar i shëndetshëm, ndërsa inflacioni është rikthyer pranë objektivit të Bankës së Shqipërisë. Stabiliteti ekonomik dhe financiar i konsoliduar i Shqipërisë përbën një premisë inkurajuese për përballimin e goditjeve nga rritja e çmimeve të naftës. Sektori bankar mbetet i mirëkapitalizuar, likuid dhe fitimprurës, ndërsa kreditimi për sektorin privat vijon të zgjerohet dhe niveli i kredive me probleme është në nivele historikisht të ulëta.
Guvernatori Sejko riafirmoi angazhimin e Bankës së Shqipërisë për ruajtjen e stabilitetit të çmimeve dhe atij financiar, si dhe për modernizimin e infrastrukturës financiare dhe kuadrit mbikëqyrës. Diskutimet u përqendruan në çështje kyçe për të ardhmen e sektorit financiar, përfshirë procesin e integrimit evropian, përafrimin e kuadrit rregullator dhe mbikëqyrës me standardet e BE-së, si dhe ndikimin e zhvillimeve teknologjike dhe inovacionit financiar.
Në këtë kontekst, Guvernatori Sejko vlerësoi veçanërisht përvojën e Austrisë në Bashkimin Evropian dhe në Eurozonë si një referencë e vlefshme për Shqipërinë në rrugëtimin e saj.
Gjatë vizitës, Banka e Shqipërisë organizoi gjithashtu një tryezë diskutimi me përfaqësues të sistemit bankar dhe drejtues të lartë të bankës qendrore. Temat e trajtuara përfshinin procesin e integrimit evropian, zhvillimet në tregjet financiare, mbikëqyrjen bankare dhe çështje të tjera të lidhura me modernizimin e sektorit.
Në fjalën e tij, Guvernatori Kocher theksoi se besimi mbetet themeli i stabilitetit financiar në një botë gjithnjë e më të paqëndrueshme dhe shumëpolare. Ai nënvizoi nevojën që bankat qendrore, autoritetet mbikëqyrëse dhe bankat të jenë të kujdesshme, rezistente dhe me vështrimin nga e ardhmja në trajtimin e rreziqeve gjeopolitike, dobësive në tregun e pasurive të paluajtshme, transformimit të shpejtë teknologjik dhe sfidave të sigurisë kibernetike.
Guvernatori Kocher gjithashtu theksoi rëndësinë e tregjeve evropiane të kapitalit më të zgjeruara dhe të integruara. Ai vuri në dukje se reduktimi i fragmentimit dhe forcimi i aksesit në kapitalin sipërmarrës janë thelbësore për të mbështetur inovacionin, konkurrueshmërinë dhe rritjen afatgjatë në Evropë dhe në rajon.
Lidhur me situatën gjeopolitike, Guvernatori Kocher vlerësoi se ndikimi mbi Evropën dhe rajonin pritet të jetë më i kufizuar krahasuar me krizën energjetike të vitit 2022. Ai nënvizoi rëndësinë e përgatitjes dhe administrimit të kujdesshëm të rreziqeve nga ana e bankave qendrore dhe sektorit bankar.
Ai gjithashtu nënvizoi lidhjet e ngushta ekonomike dhe financiare mes Austrisë dhe Shqipërisë, duke theksuar mbështetjen e vazhdueshme të Austrisë për procesin e integrimit evropian të Shqipërisë dhe forcimin e bashkëpunimit me institucionet evropiane.
Gjatë vizitës, Guvernatori Kocher pati mundësinë të vizitojë ekspozitën “Paraja rrëfen: 100 vjet jetë dhe ngjarje, Banka e Shqipërisë”, kushtuar 100-vjetorit të bankës qendrore dhe monedhës kombëtare, një moment simbolik që nënvizon trashëgiminë monetare dhe historike të vendit.
Gjatë qëndrimit në Shqipëri, Guvernatori Kocher zhvilloi gjithashtu një takim me Kryeministrin e Shqipërisë, Edi Rama, me të cilin diskutoi marrëdhëniet ekonomike mes dy vendeve, perspektivat e bashkëpunimit financiar dhe mbështetjen e Austrisë për procesin e integrimit evropian të Shqipërisë.
“`