Mbretëria e Bashkuar synon rrjetet ruse të kriptovalutave në sanksionet e fundit
Britania e Madhe, të martën, shënjestroi platformat, bankat dhe rrjetet financiare të kriptovalutave të lidhura me Rusinë. Këto masa janë marrë pasi autoritetet britanike thanë se këto platforma janë përdorur për të anashkaluar sanksionet. Si pasojë, asetet e tyre janë ngrirë dhe firmat britanike janë ndaluar të përpunojnë pagesa ose të mbajnë lidhje bankare korrespondente.
Masat fokusohen në atë që Londra e ka përshkruar si “sisteme financiare në hije” që mbështesin ekonominë e luftës së Rusisë. Mes tyre përfshihet edhe rrjeti A7, i mbështetur nga Kremlini, i cili, sipas Britanisë, është përdorur për të drejtuar fonde, për të financuar prokurimin dhe për të shfrytëzuar sistemet bankare të huaja për të shmangur kufizimet.
Paketa e re e sanksioneve synon gjithashtu bursa të kriptovalutave dhe subjekte që operojnë platforma të fokusuara në Rusi, si dhe individë të lidhur me rrjetin A7.
Britania ka deklaruar se po “gjurmon dhe mbyll” rrugët e pagesave që nxisin pushtimin e Ukrainës nga Moska.
“Ne do të vazhdojmë të veprojmë shpejt dhe me vendosmëri, së bashku me aleatët tanë, për të ekspozuar, prishur dhe çmontuar këto rrjete dhe për të siguruar që ata që mundësojnë agresionin e Rusisë të përballen me pasoja,” tha ministrja e jashtme Yvette Cooper në një deklaratë.