QKB Forcon Bashkëpunimin me InfoCamere në Itali për Modernizimin e Regjistrit Tregtar Shqiptar
Drejtori i Përgjithshëm i Qendrës Kombëtare të Biznesit (QKB), z. Etugert Llazi, së bashku me drejtues të tjerë nga QKB dhe Ministria e Ekonomisë dhe Inovacionit, zhvilluan një vizitë zyrtare pune në Padova, Itali. Vizita u zhvillua pranë InfoCamere, institucioni përgjegjës për administrimin e sistemit italian të regjistrit tregtar dhe shërbimeve digjitale për biznesin.
Kjo vizitë kishte si qëllim forcimin e bashkëpunimit ndërinstitucional dhe shfrytëzimin e mbështetjes së ofruar nga pala italiane për modernizimin e infrastrukturës teknologjike të QKB-së.
Gjatë një workshop-i të organizuar në ambientet e InfoCamere, përfaqësuesit e QKB-së dhe ekspertët italianë diskutuan çështje kyçe si:
- Implementimi i një sistemi modern dhe të avancuar për regjistrimin dhe raportimin, bazuar në standardin ndërkombëtar XBRL.
- Integrimi i sistemit të ri me infrastrukturën ekzistuese.
- Procesi i migrimit të të dhënave drejt platformës së re.
Një fokus i veçantë iu kushtua përputhshmërisë së sistemit të ri me direktivat e Bashkimit Evropian, mbrojtjes së të dhënave personale dhe garantimit të transparencës në funksionimin e regjistrit tregtar. U diskutua gjithashtu lidhja me sistemin BRIS, i cili synon ndërveprueshmërinë e regjistrit shqiptar me regjistrat europianë të biznesit.
Delegacioni shqiptar u njoh nga afër me:
- Modelin italian të regjistrit plotësisht digjital.
- Përdorimin e identifikimit elektronik dhe nënshkrimit elektronik.
- Standardet e sigurisë kibernetike dhe menaxhimit të infrastrukturës teknologjike të InfoCamere.
Si pjesë e vizitës, u zhvillua një tur në Data Center-in e institucionit italian, ku u prezantuan kapacitetet teknologjike dhe organizimi operacional për garantimin e vazhdimësisë së shërbimeve.
Takimi u zhvillua në tre sesione paralele, duke trajtuar:
- Aspektet ligjore dhe rregullatore.
- Aspektet teknike dhe IT.
- Ndikimin ekonomik të reformimit të regjistrit tregtar.
Në përfundim të takimit, palët diskutuan hapat e mëtejshëm për projektin e reformimit të Regjistrit Tregtar Shqiptar. Këto përfshijnë modelin e qeverisjes, institucionet pjesëmarrëse dhe fazat e implementimit të sistemit të ri.
Ky bashkëpunim pritet të kontribuojë drejtpërdrejt në përmirësimin e shërbimeve ndaj biznesit, rritjen e efikasitetit dhe harmonizimin e mëtejshëm të QKB-së me standardet europiane të digjitalizimit dhe transparencës.