SHBA, Meksika dhe Kanada marrin masa të përbashkëta kundër Ebolës, kufizime për udhëtarët nga Afrika
Shtetet e Bashkuara, Meksika dhe Kanadaja kanë njoftuar një sërë kufizimesh udhëtimi për personat që vijnë nga zonat e Afrikës të prekura nga epidemia e Ebolës. Këto masa synojnë mbrojtjen e qytetarëve dhe vizitorëve të tyre gjatë periudhës së Kupës së Botës.
Në një deklaratë të përbashkët, zyrtarët theksuan se “Shëndeti dhe siguria e çdo personi mbetet përparësia jonë kryesore, ndërsa i mirëpresim të gjithë në Amerikën e Veriut”, duke mos dhënë detaje të mëtejshme mbi natyrën e masave.
Organizata Botërore e Shëndetësisë (OBSH) ka shprehur shqetësim, duke deklaruar më 17 maj se shpërthimi i Ebolës në Republikën Demokratike të Kongos paraqet rrezik të përhapjes në vendet fqinje. Si pasojë, shumë qeveri kanë ndërmarrë veprime për të minimizuar këtë rrezik.
Javën e kaluar, Shtetet e Bashkuara kanë vendosur ndalimin e hyrjes për qytetarët jo-amerikanë që kanë udhëtuar në Republikën Demokratike të Kongos, Ugandë ose Sudanin e Jugut në javët e fundit. Të premten, ky ndalim u shtri edhe për mbajtësit e kartës së gjelbër, të cilët kishin qenë në këto vende gjatë 21 ditëve të mëparshme.
Kanadaja po ashtu ka vendosur të ndalojë hyrjen në vend për 90 ditë për personat që banojnë në tre vendet afrikane të përmendura, duke filluar nga e mërkura. Qytetarët kanadezë dhe banorët e përhershëm që kanë udhëtuar në këto vende në javët e fundit, por nuk shfaqin simptoma, do t’u nënshtrohen një karantine 21-ditore, duke filluar nga 30 marsi.
Meksika po zbaton gjithashtu një karantinë 21-ditore për personat që mbërrijnë me avion dhe po merr masa të tjera në aeroporte. Qytetarëve meksikanë u është kërkuar të mos udhëtojnë drejt Republikës Demokratike të Kongos.
“Së shpejti do të ketë një vaksinë”
Kreu i agjencisë shëndetësore të Bashkimit Afrikan (Africa CDC) ka siguruar se një vaksinë kundër llojit Budibugio të virusit Ebola, përgjegjës për epideminë në Republikën Demokratike të Kongos, do të jetë e disponueshme këtë vit. Për shkak të mungesës së një vaksine dhe trajtimi specifik për këtë lloj virusi, masat e zbatuara fokusohen kryesisht në pajtueshmërinë me rregulloret shëndetësore dhe identifikimin e shpejtë të rasteve.
“Jemi të sigurt se deri në fund të vitit, Qendrat për Kontrollin dhe Parandalimin e Sëmundjeve në Afrikë do të sigurojnë vaksina dhe trajtim për Budibugio-n,” ka deklaruar drejtuesja e saj, Jean Casey, gjatë një komunikimi online me gazetarët.