“`html
Sipërfaqja e lejeve rritet me 12.5%, përmasat reale janë më masive; Priten mbi 3.7 miliardë euro ndërtime
Sipërfaqja totale e parashikuar për ndërtimet e reja në tremujorin e parë të vitit 2026 është 377.061 metra katrorë, duke shënuar një rritje prej 12,5% krahasuar me tremujorin e parë të vitit 2025 (335.137 m²), raportoi INSTAT.
Megjithatë, këto shifra përfaqësojnë vetëm lejet e dhëna nga bashkitë. Aktualisht, statistikat mbi lejet e ndërtimit mbështeten vetëm në të dhënat e siguruara nga bashkitë, të cilat janë autoritetet kryesore për dhënien dhe raportimin e këtyre lejeve. Sipas VKM nr. 408, datë 13.5.2015 “Për miratimin e rregullores së zhvillimit të territorit”, në procesin e miratimit të lejeve të ndërtimit përfshihen edhe institucione të tjera përgjegjëse, përveç bashkive. Duke qenë se ende nuk ka një raportim të standardizuar dhe të plotë nga të gjitha këto entitete pranë INSTAT, të dhënat e publikuara për tremujorin e parë bazohen vetëm në burimet bashkiake. INSTAT po punon për të përfshirë të gjitha institucionet përgjegjëse në mënyrë të unifikuar në procesin e raportimit statistikor.
Lejet reale shumë më të mëdha, për ndërtime me vlerë 3.7 miliardë euro
Në mungesë të përditësimit të të dhënave nga INSTAT për sipërfaqen e lejeve të ndërtimit, që raporton prej gati një viti vetëm pushtetin vendor dhe jo lejet e Këshillit Kombëtar të Territorit dhe Ujit (KKTU), ky është treguesi më i saktë për përmasat që pritet të marrë sektori i ndërtimit në vend.
Katër mbledhjet e fundit të Këshillit Kombëtar të Territorit dhe Ujit kanë shqyrtuar disa qindra kërkesa për leje ndërtimi dhe zhvillimi, duke përfshirë projekte turizmi, rezidencialë, infrastrukturë publike, si dhe ndërhyrje në sektorin e energjisë dhe transportit.
Një tregues indirekt që mat vrullin e lejeve të ndërtimit që po jepen në vend janë arkëtimet e ndjeshme nga zëri “Pushtetit vendor”, pjesa më e madhe e të cilit përbëhet nga taksa e ndikimit në infrastrukturë. Të ardhurat nga pushteti vendor ishin 26.3 miliardë lekë për janar-prill 2026, me një rritje prej 118%, ose 14.2 miliardë lekë më shumë (rreth 150 milionë euro).
Duke pasur parasysh se taksa e ndërtimit në infrastrukturë është 4-8% e vlerës së shitjeve, dhe duke llogaritur me të paktën 4%, shifra e arkëtuar prej 150 milionë eurosh i korrespondon lejeve të ndërtimit me vlerë totale 3.7 miliardë euro!
Lejet sipas INSTAT
Në tremujorin e parë të vitit 2026:
- Janë miratuar 322 leje ndërtimi për ndërtesa të reja, duke shënuar një rritje prej 24,8 %, krahasuar me të njëjtën periudhë të vitit 2025, ku u miratuan 258 leje.
- Sipërfaqja totale e parashikuar për ndërtimet e reja në këtë tremujor është 377.061 m², duke shënuar një rritje prej 12,5 %, në krahasim me tremujorin e parë të vitit 2025 (335.137 m²).
- Vlera e përafërt e projekteve të miratuara (që përfshin si ndërtesat ashtu edhe punimet inxhinierike) arriti në 20,4 miliardë lekë, duke shënuar një rritje prej 1,6 %, krahasuar me një vit më parë (20,1 miliardë lekë).
- Ndërtimet për banim përbëjnë pjesën më të madhe të lejeve të reja, me 237 leje dhe sipërfaqe ndërtimi 185.608 m².
- Ndërtesat jo-rezidente (si hotele, ndërtesa tregtare dhe industriale) zënë pjesën tjetër me 85 leje ndërtimi dhe 191.453 m² sipërfaqe.
“`