“`html
Alarmuese: Rritje prej 400% e materialeve të abuzimit seksual ndaj fëmijëve të krijuara me inteligjencë artificiale në Europë
Shfrytëzimi seksual i fëmijëve online po përhapet me ritme shqetësuese në të gjithë Bashkimin Europian. Ekspertët gjithashtu paralajmërojnë për një shtim të materialeve abuzive të krijuara me ndihmën e inteligjencës artificiale (AI).
Sipas të dhënave më të fundit nga Observatori “Better Internet for Kids”, gjatë vitit 2025, linjat telefonike të bashkëfinancuara nga BE-ja kanë marrë më shumë se 4.5 milionë raportime për përmbajtje potencialisht të paligjshme në internet. Mbi gjysma e këtyre raportimeve lidheshin me materiale të abuzimit ose shfrytëzimit seksual të fëmijëve.
Organizata për mbrojtjen e fëmijëve Internet Watch Foundation raporton se vitin e kaluar, 63% e adresave URL globale që përmbanin materiale të abuzimit seksual të fëmijëve ishin të hostuara në shtetet anëtare të BE-së.
Capture Bulgaria rezulton vendi më problematik në BE për numrin e faqeve kriminale të hostuara, duke shënuar një rritje të konsiderueshme krahasuar me vitin 2024. Pas saj vijnë Holanda dhe Rumania, ku u identifikuan respektivisht 33,788 dhe 21,188 faqe interneti me materiale të abuzimit seksual të fëmijëve. Rritje të dukshme janë raportuar gjithashtu në Francë dhe Gjermani gjatë vitit 2025.
Në nivel global, tre vendet kryesore përsa i përket përqindjes së faqeve me këtë lloj përmbajtjeje janë Bullgaria me 28%, SHBA me 16% dhe Holanda me 11%.
Ekspertët theksojnë se inteligjenca artificiale po përdoret gjithnjë e më shumë për krijimin e materialeve abuzive. Sipas Internet Watch Foundation, gjatë gjashtë muajve të parë të vitit 2025 është regjistruar një rritje prej 400% e materialeve të abuzimit seksual të fëmijëve të krijuara me AI, të cilat janë identifikuar në 210 faqe interneti. Raportet për këtë lloj përmbajtjeje lidhen gjithnjë e më shumë me raste të zhvatjes seksuale, shantazhit dhe ngacmimeve online.
Një në pesë fëmijë përjeton ngacmim seksual online
Organizata Missing Children Europe vë në dukje se lidhja mes ngacmimit seksual online dhe zhdukjes së fëmijëve shpesh nënvlerësohet. Në Europën Perëndimore, një në pesë fëmijë deklaron se ka përjetuar ngacmim ose abuzim seksual online para moshës 18-vjeçare. Vetëm gjatë vitit 2025, linjat telefonike për fëmijët e zhdukur në Europë identifikuan 92 raste ku ngacmimi seksual online lidhej me zhdukjen e një fëmije.
“`