Tensione në Rumani pas rrëzimit të dronit rus; Bukureshti mbyll konsullatën ruse në Konstancë
Situata në Rumani është tensionuar ndjeshëm pas rrëzimit të një droni rus në një pallat apartamentesh në qytetin e Galaçit. Incidenti la dy persona të plagosur dhe shkaktoi dëme materiale.
Presidenti rumun, Nikușor Dan, deklaroi pas një mbledhjeje urgjente të Këshillit Suprem të Mbrojtjes Kombëtare se Rusia mban përgjegjësi të plotë për incidentin.
“Përgjegjësia e plotë i takon Rusisë, një shtet që prej më shumë se katër vitesh zhvillon luftë agresive kundër Ukrainës”, deklaroi kreu i shtetit rumun.
Ai njoftoi gjithashtu se Rumania ka shpallur “non grata” konsullin e përgjithshëm rus në Konstancë dhe ka vendosur mbylljen e Konsullatës së Përgjithshme të Rusisë në qytet.
Sipas autoriteteve rumune, droni i rrëzuar është identifikuar si një model rus “Geran-2”, i nisur nga territori rus. Presidenti rumun tha se autoritetet kanë gjurmuar trajektoren e tij dhe kanë konstatuar se ishte pjesë e një grupi prej 43 dronësh rusë, nga të cilët vetëm një arriti në territorin rumun.
Ndërkohë, Moska reagoi menjëherë ndaj vendimit të Bukureshtit. Zëdhënësja e Ministrisë së Jashtme ruse, Maria Zakharova, paralajmëroi se Rusia do të ndërmarrë kundërmasa ndaj Rumanisë.
“Kundërmasat nuk do të vonojnë”, deklaroi ajo për agjencinë ruse RIA Novosti.
Në një incident tjetër, një dron i dytë i pashpërthyer u gjet në rajonin Baștea të qarkut Maramureș, pranë kufirit me Ukrainën. Zona u izolua menjëherë nga autoritetet, ndërsa hetimet po vazhdojnë për të përcaktuar origjinën dhe trajektoren e mjetit fluturues pa pilot.