“`html
Shqipëria humb “kurorën” e rritjes më të lartë të netqëndrimeve turistike në Europë
Që prej pandemisë, Shqipëria kryesoi Europën për rritjen e lartë të netqëndrimeve të turistëve, duke u shndërruar në një destinacion në zhvillim. Megjithatë, të dhënat e fundit të publikuara nga Eurostat për tremujorin e parë të këtij viti tregojnë se Shqipëria e ka humbur këtë pozicion, por mbetet sërish ndër vendet me rritjen më të shpejtë.
Sipas Eurostat, për tremujorin e parë, netqëndrimet në Shqipëri, si të turistëve vendas ashtu dhe atyre ndërkombëtarë, u rritën me 11.2%. Ky shifër shënon një ngadalësim ndjeshëm krahasuar me zgjerimin prej 30% që u shënua në vitin 2025, duke krijuar një diferencë të theksuar me vendet e tjera. Gjithsesi, Shqipëria vijon të jetë ndër vendet me rritjen më të lartë, duke u renditur e dyta pas Irlandës, e cila ka marrë pozicionin kryesor këtë vit me 35.3%.
Në rajon, Mali i Zi ka shënuar një tendencë negative me -2.4%, po ashtu edhe Kosova me -3.9%, ndërsa Serbia ka treguar një ecuri më pozitive me 6.5%.
Sipas Eurostat, netqëndrimet e turistëve vendas në Shqipëri u rritën me ritme më të shpejta se të atyre të huaj, përkatësisht me 14.1% dhe 9.6%.
Europa, rritje 3.4%
Në tremujorin e parë të vitit 2026, në strukturat akomoduese turistike në Bashkimin Europian u regjistruan 471.1 milionë netqëndrime, duke shënuar një rritje prej 3.4% krahasuar me të njëjtën periudhë të vitit 2025.
- Janari regjistroi 143.5 milionë netqëndrime, me rritje 3.2% ndaj janarit 2025.
- Shkurti pati 154.4 milionë netqëndrime, me rritje 3.4%.
- Ndërsa marsi shënoi 173.2 milionë netqëndrime, me rritje 3.7%.
Në nivel vendesh, Irlanda shënoi rritjen më të lartë të netqëndrimeve në strukturat akomoduese turistike gjatë tremujorit të parë, me 35.3%, e ndjekur nga Malta me 11.1% dhe Danimarka me 9.3%.
Ndër 9 vendet e BE-së që regjistruan rënie të netqëndrimeve, Lituania pati tkurrjen më të madhe me -12.9%, e ndjekur nga Rumania me -6.7% dhe Luksemburgu me -3.8%.
Vizitorët e huaj përbënin rreth 46.6% të të gjitha netqëndrimeve në tre muajt e parë të vitit 2026, me dallime të mëdha mes vendeve të BE-së. Peshën më të lartë të netqëndrimeve nga vizitorët e huaj gjatë kësaj periudhe e regjistruan Malta me 93.3%, Qipro me 85.6% dhe Luksemburgu me 85.1%. Në të kundërt, vizitorët e huaj përbënin vetëm rreth një të pestën e netqëndrimeve në Gjermani me 19.9%, Poloni me 20.2% dhe Rumani me 22.4%.
Krahasuar me tremujorin e parë të vitit 2025, u rritën si netqëndrimet e vizitorëve të huaj, me 5.5%, ashtu edhe ato të vizitorëve vendas, me 1.7%. Rritjet më të mëdha të netqëndrimeve nga vizitorët e huaj u regjistruan në Irlandë me 42.3%, Lituani me 24.1% dhe Sllovaki me 15.4%. Në kahun tjetër, rëniet më të forta të vizitorëve të huaj u shënuan në Letoni me -7.5%, Bullgari me -4.3% dhe Belgjikë me -4.0%.
“`