Tender prej 2.4 milionë eurosh për zgjerimin e rrjetit të kanalizimeve në Shirokë dhe Zogaj
Zgjerimi i rrjetit të kanalizimeve në Shirokë dhe Zogaj, me qëllim përmirësimin e kushteve për banorët dhe për t’iu përgjigjur kërkesave që sjellin flukset turistike, pritet të kushtojë të paktën 2.4 milionë euro.
Shoqëria Rajonale Ujësjellës-Kanalizime Qarku Shkodër ka shpallur së fundmi, në sistemin e Agjencisë së Prokurimit Publik, një procedurë për ndërtimin dhe rikonstruksionin e infrastrukturës së kanalizimeve në zonat turistike të Shirokës dhe Zogajt.
Kontrata parashikon realizimin e rrjetit të kanalizimeve për ujërat e ndotura urbane, duke synuar mbulimin e plotë të dy zonave me një sistem modern grumbullimi dhe largimi të tyre. Projekti përfshin gjithashtu zëvendësimin e segmenteve të amortizuara dhe rehabilitimin e puseve ekzistuese të kontrollit.
Sipas dokumenteve të tenderit, objektivi kryesor është lidhja e plotë e popullsisë rezidente me rrjetin e kanalizimeve, si dhe përmirësimi i standardeve mjedisore për trajtimin dhe shkarkimin e ujërave të ndotura, në përputhje me legjislacionin shqiptar.
Përveç punimeve ndërtimore, kontrata përfshin studim-projektimin e detajuar të sistemit, llogaritjet hidraulike dhe modelimin e funksionimit të rrjetit gjatë periudhave të ngarkesës minimale dhe maksimale. Dokumentacioni përcakton gjithashtu materialet, fazat e ndërhyrjes dhe parametrat e zbatimit të investimit.
Një ndër komponentët e projektit lidhet me furnizimin me ujë të Shirokës. Plani parashikon hapjen e deri në tre puseve në pjesën juglindore të zonës, me thellësi të rekomanduar rreth 100 metra, ndërsa karakteristikat përfundimtare do të përcaktohen nga studimet hidrogjeologjike. Investimi përfshin gjithashtu stacione pompimi, linja furnizimi me energji elektrike, transformatorë dhe impiant klorinimi.
Nevoja për zgjerimin e kapaciteteve mbështetet edhe nga projeksionet afatgjata të zhvillimit turistik deri në vitin 2074. Autoritetet kanë llogaritur rritje graduale të numrit të vizitorëve, duke marrë në konsideratë turistët që akomodohen në hotele, apartamente dhe vizitorët ditorë. Kjo pritet të sjellë rritje të volumeve të ujërave të shkarkuara, duke e bërë të domosdoshëm modernizimin e infrastrukturës së kanalizimeve në një nga zonat me potencialin më të lartë turistik të brigjeve të Liqenit të Shkodrës.