Incidenti me dronin rus në Rumani, NATO përforcon krahun lindor: “Do mbrojmë çdo centimetër të territorit aleat”
Pas një incidenti të fundit me një dron rus, i cili u përplas në çatinë e një pallati në Rumani, NATO po ndërmerr masa për të përforcuar krahun e saj lindor në Evropë. Admirali Giuseppe Cavo Dragone, kryetar i Komitetit Ushtarak të NATO-s, theksoi se aleanca po vepron për të forcuar këtë zonë.
“NATO tashmë po ndërmerr veprime, po përforcon krahun lindor. Ne po ndërmarrim veprime atje,” tha ai në një intervistë për televizionin Al Arabiya. Ai u pyet në lidhje me planet e aleancës për vendosjen e trupave shtesë në lindje dhe angazhimin për mbrojtjen e “çdo centimetri” të territorit aleat në rast incidentsh të ngjashme me atë rumun.
Aleanca synon të krijojë atë që admirali italian e quajti një “autoritet të sigurt”, në mënyrë që “gjithçka të jetë e lidhur nga Baltiku deri në Detin e Zi”. Dragone nuk dha detaje specifike në lidhje me përbërjen e forcës apo natyrën e këtij autoriteti.
Më 29 maj, Ministria rumune e Mbrojtjes raportoi se një dron ishte rrëzuar mbi çatinë e një pallati në qytetin Galați. Bukureshti fajësoi Rusinë për këtë incident.