Kreu i Kuvendit, Niko Peleshi, ka adresuar shqetësimet lidhur me trajtimin e figurës së diktatorit Enver Hoxha në Kuvend. Ai ka sqaruar se teksti në fjalë është nxjerrë nga konteksti dhe nuk ka pasur qëllim vlerësimin apo mbrojtjen e tij, duke qenë thjesht informativ.
Peleshi ka shprehur keqardhje për keqkuptimin e krijuar, duke theksuar se Enver Hoxha ishte përmendur vetëm në lidhje me vitin e lindjes, bazuar në një tekst nga fjalori enciklopedik. Ai ka kërkuar rishikimin e procedurave të brendshme të bibliotekës së Kuvendit për të siguruar shoqërimin e materialeve me kontekst historik të qartë.
Nga ana tjetër, kryetari i PD-së, Sali Berisha, i është kthyer Peleshit, duke e akuzuar për hapjen e seancës me “apologji hipokrite” dhe futjen e Enver Hoxhës në axhendë me urdhër të Ramës. Berisha ka vënë në dyshim si mund të lejohet një figurë e tillë në Kuvend, duke e krahasuar me situatën imagjinare të futjes së Hitlerit në Bundestag.