Pritjet e bizneseve dhe institucioneve financiare për inflacionin u rritën në tremujorin e parë të vitit.
Sipas vrojtimeve të kryera nga Banka e Shqipërisë, në tremujorin e parë të vitit 2026, bizneset pritnin që inflacioni në tremujorin e parë të vitit 2027 të ishte 3.9%. Kjo shënon një rritje prej 0.6 pikë përqindje krahasuar me parashikimin e tremujorit të katërt të vitit 2025.
Ndërkohë, agjentët financiarë parashikojnë që inflacioni pas një viti të jetë 2.9%, rreth 0.2 pikë përqindje më lart se inflacioni i pritur në parashikimet e tremujorit IV 2025. Pritjet e tyre për një horizont kohor më të gjatë (pas dy dhe tre vitesh) kanë mbetur të pandryshuara në nivelin 3%.
Në të kundërt, pritjet e konsumatorëve për inflacionin u rishikuan lehtësisht për poshtë në tremujorin e parë, por niveli i pritshëm mbetet i lartë, rreth 9.2%.
Konflikti në Lindjen e Mesme ka sjellë një zhvendosje për lart të pritjeve për inflacionin nga agjentët ekonomikë, kryesisht për shkak të shtrenjtimit të menjëhershëm të karburanteve.
Sipas të dhënave nga INSTAT, inflacioni në muajin prill ishte 2.8% dhe në maj arriti nivelin 3%, më i larti në dy vitet e fundit. Rritja në muajt e fundit ka ardhur kryesisht nga komponenti i inflacionit të importuar, sidomos nga çmimet e karburanteve, të cilat deri në tremujorin e parë kishin një kontribut negativ në inflacionin total.
Nga ana tjetër, edhe përbërësit më të qëndrueshëm të inflacionit shënuan një rritje të ndjeshme në muajin prill. Sipas Bankës së Shqipërisë, inflacioni bazë, inflacioni bazë neto dhe inflacioni që përjashton ushqimet dhe mallrat energjetike u rritën njëkohësisht, duke treguar se presionet për rritjen e çmimeve mbeten të larta, edhe përtej efektit afatshkurtër të shtrenjtimit të naftës.
Shifrat e Bankës Qendrore tregojnë se inflacioni vjetor bazë u rrit në 2.92%, nga 2.72% një muaj më parë. Ai mbetet gjithashtu në rritje krahasuar me të njëjtën periudhë të vitit 2025, kur shënonte nivelin 2.53%. Inflacioni bazë përjashton produktet me luhatshmëri të lartë si ushqimet dhe energjia, duke synuar të zhveshë rritjen e përgjithshme të çmimeve nga luhatjet afatshkurtra.
Analizat e Bankës së Shqipërisë sugjerojnë se inflacioni bazë relativisht i lartë në pjesën e parë të këtij viti ka ardhur kryesisht nga inflacioni i nëngrupit të qirave, me kontribute pozitive, ndonëse në ngadalësim, nga disa kategori shërbimesh të lidhura me turizmin. Presionet e brendshme inflacioniste mbeten kontribuuesi kryesor.
Paralelisht me inflacionin bazë, edhe inflacioni bazë neto u rrit në përmasa të ngjashme. Për prillin, ky tregues zbriti në 3.61%, nga 3.37% në mars dhe ishte në rritje nga niveli prej 2.19% i një viti më parë. Inflacioni bazë neto përjashton gjithashtu nëngrupet e ushqimeve të përpunuara.
Ndërkohë, inflacioni që përjashton të gjitha produktet ushqimore dhe energjetike në prill 2026 zbriti në 3.51%, nga 3.28% në mars dhe 2.12% një vit më parë.
Parashikimet e skenarit bazë të Bankës së Shqipërisë sugjerojnë një rritje graduale të inflacionit drejt objektivit 3% gjatë vitit 2026, të mbështetur nga qëndrueshmëria e presioneve të brendshme inflacioniste dhe rritja e inflacionit të importuar. Megjithatë, këto parashikime shoqërohen nga pasiguri të shtuara për shkak të intensifikimit të presioneve nga konflikti në Lindjen e Mesme dhe ndikimi i tij në çmimet e naftës dhe lëndëve të tjera bazë.