“`html
Anglia mbetet pa pajisje: Vjedhësit grabisin këpucët dhe materialet stërvitore nga furgoni
Një ngjarje e pazakontë ka shqetësuar përgatitjet e kombëtares së Anglisë për Botërorin 2026. Mediat britanike raportojnë se gjatë transportit të materialeve stërvitore drejt bazës së tyre në Kansas Siti, yjeve të Anglisë u janë vjedhur këpucët nga një furgon. Ndërkohë, janë bërë dy arrestime lidhur me ngjarjen.
Topat e futbollit dhe pajisjet e tjera stërvitore janë zhdukur gjatë tranzitit nga Florida në Kansas Siti, në atë që është përshkruar si një grabitje masive.
Anglia kishte zhvilluar kampin e saj stërvitor para Kupës së Botës në Florida, ku luajti kundër Zelandës së Re, Kosta Rikës dhe ekipit lokal Majemi Junajtid. Ndërsa ekipi fluturoi drejt hotelit të shtunën në mëngjes, i gatshëm për stërvitjen e pasdites, sendet e tyre ishin dërguar më parë me transport tokësor, gjatë të cilit ka ndodhur kjo vjedhje. Rrethanat e sakta të grabitjes janë ende nën hetim.
Sipas “Daily Mail”, stafi ka nisur menjëherë përpjekjet për të siguruar këpucë të reja për lojtarët kryesorë, në mënyrë që të mos pengohen përgatitjet.
Mes objekteve të vjedhura ishin edhe pajisje për analizat taktike, tabelat e shënimeve të Tomas Tuhel si dhe një tavolinë masazhi. I njëjti burim sqaron se pas kësaj grabitjeje, në kamion kishte mbetur vetëm një top futbolli.
Stafi po përpiqet të kuptojë saktësisht se si ka ndodhur grabitja. Megjithatë, “talkSPORT” ka zbuluar se janë bërë dy arrestime dhe ekzistojnë dyshime se shoferët e ngarkuar me transportin e materialeve mund të jenë të përfshirë.
Anglia do të nisë pjesëmarrjen e saj në Botëror me ndeshjen kundër Kroacisë këtë të mërkurë.
“`