## Anglija Përballet me Kroacinë në Kupën e Botës 2026: Tuhel Zbulon Strategjinë Sulmuese
Anglia pritet të bëjë disa ndryshime strategjike në formacionin e saj për ndeshjen hapëse të Kupës së Botës 2026 kundër Kroacisë. Sipas raportimeve të “Daily Mail”, trajneri Tomas Tuhel po shqyrton mundësinë që Antoni Gordon të zëvendësojë Rashford në formacionin titullar, duke i dhënë përparësi yllit të Njukasëllit për krahun e majtë të sulmit.
Trajneri gjerman vlerëson Gordonin për disiplinën e tij taktike, intensitetin dhe kontributin në fazën mbrojtëse, cilësi që ai i konsideron thelbësore për të vendosur kontrollin e lojës që në fillim. Ndërkohë, Rashford shihet si një armë e fortë nga stoli, ku shpejtësia dhe aftësia e tij për të krijuar diferencë në momente kyçe mund të jenë më të vlefshme në pjesën e dytë të ndeshjes.
Në mbrojtje, pritet që Stons të formojë qendrën e repartit të prapavijës së bashku me Ezri Konsa. Megjithëse Guehi ishte konsideruar si favorit para turneut, Tuhel duket se preferon forcën fizike dhe dominimin në duelet ajrore të Konsas, të cilat plotësojnë profilin teknik të Stons.
Shqetësimi kryesor për ekipin anglez mbetet gjendja fizike e Bukayo Sakas. Futbollisti i Arsenalit ende po vuan pasojat e një problemi afatgjatë me tendinin e Akilit dhe nuk ka arritur ende formën optimale. Saka luajti vetëm një pjesë në miqësoren e fundit kundër Majemit, të cilën Anglia e fitoi 6-0. Për këtë arsye, Tuhel po shqyrton mundësinë që ai të hyjë si zëvendësues, ndërsa Noni Madueke pritet të nisë ndeshjen në krahun e djathtë të sulmit.
Para sfidës me Kroacinë, duket se Tuhel ka zgjedhur një qasje më të balancuar, duke ruajtur disa nga armët më të rrezikshme të ekipit për t’i aktivizuar gjatë lojës.