Vance anulon udhëtimin në Gjenevë, shtyhen bisedimet SHBA-Iran për shkak të tensioneve në Libanin jugor
Përpjekjet diplomatike për të avancuar marrëveshjen mes Shteteve të Bashkuara dhe Iranit duket se kanë hasur në pengesa të reja, pasi kontakti i parë i planifikuar në Gjenevë pas nënshkrimit të memorandumit të mirëkuptimit mes palëve është shtyrë.
Sipas raportimeve të rrjetit libanez Al Mayadeen, i cili konsiderohet i afërt me Hezbollah, delegacioni negociator iranian anuloi në momentet e fundit udhëtimin drejt Gjenevës për shkak të zhvillimeve të fundit në jug të Libanit.
Burime të cituara nga media libaneze bëjnë të ditur se delegacioni iranian ishte gati të nisej për raundin e parë të negociatave, i cili parashikohej të zgjasë 60 ditë, por vendosi të pezullojë udhëtimin. Arsyeja e dhënë është se operacionet e vazhdueshme ushtarake izraelite në territorin libanez përbëjnë një faktor që ndikon drejtpërdrejt në procesin diplomatik.
Sipas të njëjtave burime, Irani kishte njoftuar paraprakisht SHBA dhe ndërmjetësit ndërkombëtarë se situata në Liban mbetet një element kyç i negociatave. Teherani pretendon se veprimet ushtarake izraelite në jug të Libanit bien ndesh me parimet e përcaktuara në memorandum dhe marrëveshjen kornizë.
Ndërkohë, vetëm disa orë më vonë, JD Vance anuloi gjithashtu udhëtimin e planifikuar drejt Gjenevës. Në një deklaratë, Shtëpia e Bardhë tha se vizita u shty për shkak të “çështjeve logjistike të pazgjidhura që lidhen me fazën e ardhshme të negociatave”.