Banka e Shqipërisë ka nisur procesin e konsultimit publik për një projekt-rregullore të re, e cila synon uljen e komisioneve që u aplikohen tregtarëve për pranimin e pagesave me kartë. Projekt-rregullorja, e titulluar “Për tarifat e shkëmbimit për transaksionet e pagesave të bazuara në kartë”, është një përshtatje e një direktive të Bashkimit Europian të vitit 2015.
Ky rregullim përcakton limitet për tarifën e shkëmbimit (interchange fee), e cila përfaqëson tarifën që banka e tregtarit i paguan bankës që ka emetuar kartën e blerësit për çdo transaksion. Sipas projekt-rregullores, kjo tarifë nuk do të mund të kalojë 0.2% të vlerës së transaksionit për kartat e debitit dhe 0.3% për kartat e kreditit.
Vendosja e këtyre kufijve pritet të ulë ndjeshëm komisionin total që tregtarët paguajnë për shitjet me kartë. Aktualisht, tarifat e shkëmbimit vlerësohen mesatarisht rreth 1.5%, duke u ndryshuar në varësi të llojit të aktivitetit të biznesit.
Komisioni total që paguajnë tregtarët përfshin edhe dy elementë të tjerë:
- Tarifat e skemës ose të rrjetit (scheme fees): Këto janë tarifa që paguhen te kompanitë si Visa apo Mastercard për përdorimin e rrjetit të tyre për autorizimin dhe procesimin e transaksioneve.
- Marzhi i bankës së tregtarit (acquirer markup): Kjo është pjesa që mban banka e tregtarit për të mbuluar kostot e pajisjes POS, procesimin teknik dhe rrezikun.
Kur bashkohen të gjithë këta zëra, komisioni që një tregtar paguan sot mund të arrijë deri në 3%, veçanërisht për pagesat me karta të lëshuara jashtë vendit. Për pagesat me karta të lëshuara nga institucione vendase, komisionet janë më të ulëta.
Banka e Shqipërisë vlerëson se ky rregullim mund të ulë komisionet deri në 1%, ndërsa përfaqësues të sektorit bankar mendojnë se një prag më realist është 1.5%.
Miratimi dhe zbatimi i kësaj rregulloreje do të kërkojë kohë, pasi varet nga miratimi i ndryshimeve në ligjin “Për shërbimet e pagesave”, i cili aktualisht është në fazën e konsultimit publik dhe nuk i është propozuar ende Kuvendit. Pas hyrjes në fuqi të ligjit, pritet që Banka e Shqipërisë të miratojë rregulloren e re.