“`html
Nga 62 deri në 250 euro, Tatimet vijojnë pagesat e kompensimeve për fëmijët nga DIVA
Administrata Tatimore po vijon me pagesat e kompensimeve për tatimin e mbipaguar, të llogaritur nga Deklarata Individuale Vjetore e të Ardhurave (DIVA), pas zbritjes së shpenzimeve për arsimin dhe rritjen e fëmijëve.
Për çdo fëmijë në ngarkim, shuma e zbritur nga totali i të ardhurave ishte 48 mijë lekë. Ndërkohë, për arsimin e fëmijëve, një përfitim i cili u jepet vetëm aplikantëve me të ardhura bruto nën 1.2 milionë lekë gjatë plotësimit të DIVA 2025, u llogarit 100 mijë lekë. Kjo shumë është maksimale, fikse pavarësisht numrit të fëmijëve, dhe kërkon dokumentim me fatura të fiskalizuara.
Sipas të dhënave nga aplikuesit, administrata tatimore po kryen pagesat e kompensimeve në llogaritë bankare të deklaruara në e-Filing. Në një rast konkret, një aplikuese me të ardhura bruto vjetore mbi 1.2 milionë lekë dhe me një fëmijë në ngarkim, e cila dorëzoi kërkesën më 20 shkurt 2026, mori kompensimin prej 6,200 lekë më 24 qershor 2026, rreth katër muaj pas aplikimit.
Siç është llogaritur më parë nga “Monitor”, shuma e kompensimit për arsimin e fëmijëve varion nga rreth 62 euro deri në 250 euro, në varësi të nivelit të të ardhurave dhe numrit të fëmijëve në ngarkim. Këto vlera po konfirmohen edhe nga përfituesit që kanë marrë kompensimin.
Bazuar në shembujt e publikuar nga “Monitor”, kompensimi ndryshon sipas të ardhurave vjetore dhe zbritjeve të përfituara për fëmijët në ngarkim:
- Për individët me të ardhura nën 1.2 milionë lekë në vit, përfitimi është më i lartë, pasi përfshihen edhe shpenzimet e arsimit deri në 100 mijë lekë.
- Për një individ me të ardhura bruto vjetore mbi 1.2 milionë lekë dhe një fëmijë në ngarkim, kompensimi për arsimin llogaritet rreth 62 euro në vit.
- Për një individ me të ardhura mbi 1.2 milionë lekë në vit dhe dy fëmijë në ngarkim nën moshën 18 vjeç, kompensimi arrin rreth 12 mijë lekë, pas zbritjes së shpenzimeve për fëmijët.
- Për personat me paga mbi 200 mijë lekë në muaj, të cilët tatohen me normën 23%, kompensimi llogaritet në 11,040 lekë.
Shuma më e lartë e kompensimit, sipas shembujve të publikuar, përfitohet nga individët me të ardhura nën 1.2 milionë lekë në vit, të cilët përfitojnë njëkohësisht zbritjen për fëmijët në ngarkim dhe shpenzimet e arsimit. Në rastin e një individi me dy fëmijë në ngarkim, kompensimi mund të arrijë deri në rreth 250 euro.
Aplikimet për DIVA 2025 u hapën më 3 shkurt 2026 përmes sistemit elektronik e-Filing. Administrata Tatimore ka sqaruar se pas plotësimit të deklaratës, individët që rezultojnë me tatim të mbipaguar duhet të paraqesin një kërkesë për rimbursim në sistemin e-Tax, përmes modulit “eFiling Im” dhe seksionit “Çështjet e mia”.
Bashkë me kërkesën, aplikantët duhet të dorëzojnë dokumentin me të dhënat e llogarisë bankare (IBAN), certifikatën familjare dhe dokumentacionin që provon shpenzimet e arsimit të fëmijëve, përfshirë kontratat me institucionet arsimore dhe faturat e pagesave.
Sipas të dhënave të aplikimeve, administrata tatimore ka nisur dhënien e kompensimit edhe për individët që kanë rezultuar me tatim të mbipaguar, por që nuk kanë fëmijë në ngarkim. Kjo kategori rezultoi me tatim të mbipaguar pasi në DIVA iu rillogarit tatimi për të ardhurat vjetore, duke bërë që shuma e tatimit të paguar çdo muaj të rezultonte më e lartë pas rillogaritjes. Në rast se diferenca ishte pozitive, edhe kjo kategori kishte të drejtë të kërkonte tepricën për kompensim.
Tatimet gjithashtu sqaruan se e drejta për të kërkuar kompensimin nuk humbet menjëherë, pasi individët mund të aplikojnë për rimbursimin e tatimit të mbipaguar brenda afatit ligjor prej 5 vitesh.
Afati për plotësimin e DIVA 2025 përfundoi më 31 Mars 2026. Në total për vitin 2025 janë plotësuar 164,263 deklarata individuale të të ardhurave, duke shënuar një rritje prej 25% krahasuar me të njëjtën periudhë të vitit të kaluar.
Sipas të dhënave, rreth 77 mijë individë pritet të përfitojnë kompensim nga sistemi DIVA për fëmijët nën moshën 18 vjeç. Sistemi ka gjeneruar një fond total prej 1.4 miliardë lekësh për rimbursim për individët me tepricë kreditore. Deri tani janë kërkuar vetëm 670 milionë lekë nga individët për t’u kaluar në llogaritë e tyre bankare.
“`