Etna zgjohet: Re e dendur hiri mbulon vullkanin më të madh aktiv në Europë, pezullohen fluturimet
Vullkani Etna, i cili është vullkani më i madh aktiv në Evropë, ka shfaqur një aktivitet të shtuar që nga fundjava. Si pasojë, një re e dendur hiri është lëshuar mbi zonën përreth. Sipas Institutit Kombëtar Italian të Gjeofizikës dhe Vullkanologjisë, reja e hirit është ngritur rreth 1.5 kilometra mbi kraterin e vullkanit, ndërsa autoritetet po monitorojnë në mënyrë të vazhdueshme evolucionin e aktivitetit.
Për shkak të prezencës së hirit vullkanik, autoritetet italiane kanë marrë vendimin për të pezulluar të gjitha fluturimet nga dhe drejt Aeroportit Catania-Fontanarossa. Sipas njoftimit zyrtar, ky pezullim do të jetë në fuqi deri të martën në orën 10:00 me kohën lokale. Pas kësaj ore, autoritetet do të kryejnë një rivlerësim të situatës për të vendosur nëse trafiku ajror mund të rifillojë.
Autoritetet u bëjnë thirrje të gjithë pasagjerëve që kanë planifikuar udhëtime drejt ose nga Catania të kontaktojnë paraprakisht kompanitë ajrore. Kjo për të marrë informacione mbi statusin e fluturimeve të tyre përpara se të paraqiten në aeroport.