Tmerr në Poloni: Ish-prifti akuzohet për vrasje makabre
Një ish-prift në Poloni po përballet me akuza për një vrasje tepër të rëndë, pasi dyshohet se i ka prerë kokën një burri të pastrehë me sëpatë dhe më pas i ka vënë flakën, ndërkohë që viktima mund të ishte ende gjallë.
Sipas prokurorëve, Miroslav M. akuzohet se vrau 68-vjeçarin Anatol C. në korrikun e vitit të kaluar, pranë fshatit Laszopol. Ngjarja mendohet të ketë ardhur pas një konflikti për një apartament, të cilin prifti e kishte premtuar t’ia blinte ose t’ia jepte me qira viktimës.
Hetimet tregojnë se pas një debati, i dyshuari ndaloi automjetin në një rrugë të izoluar, mori një sëpatë dhe goditi disa herë 68-vjeçarin në kokë. Më pas, ai dyshohet se e spërkati viktimën me benzinë dhe i vuri flakën.
Autopsia zbuloi se viktima kishte pësuar dëmtime të rënda në kokë dhe djegie në rreth 80% të trupit.
Prokurorët bënë të ditur se ish-prifti e ka pranuar krimin gjatë marrjes në pyetje, duke përshkruar në detaje mënyrën e kryerjes së vrasjes.
Hetimet zbuluan gjithashtu se disa javë më parë, i pandehuri kishte tentuar ta vriste të njëjtin person, por ishte penguar nga kalimi rastësor i një dëshmitari.
Ekspertiza psikiatrike ka përfunduar se Miroslav M. është i aftë mendërisht për t’u gjykuar.
Pas ngjarjes, Kryepeshkopi i Varshavës kërkoi falje publike dhe i bëri thirrje Vatikanit ta largojë përfundimisht nga kleri. Kryepeshkopata mbuloi gjithashtu shpenzimet e funeralit të viktimës.
Nëse shpallet fajtor, ish-prifti rrezikon dënimin me burgim të përjetshëm.