“`html
Qeveria redukton fondet për fermerët, rrit fondin e Zhvillimit me rreth 80 milionë euro
Qeveria ka ulur fondet e planifikuara për zhvillimin rural dhe mbështetjen e fermerëve, ndërkohë që ka shtuar me 7.5 miliardë lekë, ose rreth 75 milionë euro, buxhetin e Fondit Shqiptar të Zhvillimit.
Sipas të dhënave nga rishikimi i buxhetit, fondi i destinuar për programin e zhvillimit rural dhe mbështetjen e prodhimit bujqësor, blegtoral, agroindustrisë dhe marketingut është ulur me 113.7 milionë lekë, rreth 1.5 milionë euro. Financimi i programit ka kaluar nga rreth 7.69 miliardë lekë në buxhetin fillestar, në rreth 7.58 miliardë lekë pas ndryshimeve. Ky reduktim përfaqëson 1.5% të fondit fillestar.
Ky program përfshin politikat dhe masat që synojnë mbështetjen e fermerëve dhe blegtorëve, zhvillimin e industrisë agropërpunuese, rritjen e prodhimit vendas dhe përmirësimin e tregtimit të produkteve bujqësore. Pavarësisht se ulja është relativisht e vogël në raport me fondin e përgjithshëm, ajo vjen në një periudhë kur disa nga treguesit kryesorë të bujqësisë dhe blegtorisë po shënojnë rënie.
Sipas të dhënave të INSTAT për vitin 2025:
- Prodhimi i grurit ra me 10.1%.
- Prodhimi i patates ra me 7.2%.
- Prodhimi i pemëve frutore u tkurr me 12.8%.
- Prodhimi i ullinjve ra me 2.3%.
- Prodhimi në sera ishte 0.9% më i ulët krahasuar me një vit më parë.
Dobësi janë shfaqur edhe në sektorin e blegtorisë:
- Në vitin 2024, numri i deleve ra me 3.8%.
- Numri i dhive ra me 2.2%.
- Numri i derrave ra me 9.4%.
- Prodhimi i përgjithshëm i qumështit u reduktua me 2.7%.
- Prodhimi i mishit në peshë të gjallë ra me 3.8%.
Fondi Shqiptar i Zhvillimit përfiton 7.5 miliardë lekë shtesë
Në të njëjtin rishikim buxhetor, financimi për Fondin Shqiptar të Zhvillimit është rritur ndjeshëm. Buxheti i këtij institucioni është shtuar me 7.5 miliardë lekë, duke arritur në 32.3 miliardë lekë, nga rreth 24.8 miliardë lekë që ishte parashikuar fillimisht. Kjo rritje përfaqëson një zgjerim prej 30.2% të financimit total.
Pjesa më e madhe e fondeve shtesë është përqendruar te zëri i përgjithshëm “Programe Zhvillimi”. Financimi për këtë program është rritur me 5.5 miliardë lekë, duke kaluar nga rreth 14.9 miliardë lekë në 20.4 miliardë lekë. Kjo rritje, krahasuar me buxhetin fillestar, është 36.9%. Programi “Programe Zhvillimi” përfiton rreth 73% të shtesës së përgjithshme të akorduar për Fondin Shqiptar të Zhvillimit.
Ky zë buxhetor i gjerë mund të përfshijë projekte infrastrukturore dhe zhvillimore të zbatuara nga FSHZH, si rehabilitimi i rrugëve, rikualifikimi urban, sistemimi i shesheve dhe hapësirave publike, si dhe investimet në zona me potencial turistik dhe ekonomik.
Financime shtesë janë dhënë edhe për programin “Infrastruktura Vendore dhe Rajonale”. Buxheti i tij është rritur me 1.4 miliardë lekë, ose 18.9%, duke kaluar nga rreth 7.4 miliardë lekë në 8.8 miliardë lekë.
Ndërkohë, programi “100 Fshatrat” përfiton një shtesë prej 600 milionë lekësh. Fondi total për këtë program rritet nga 2.5 miliardë lekë në 3.1 miliardë lekë, ose me 24% krahasuar me planifikimin fillestar.
“`