“`html
“Revolucioni Flamingo” merr mbështetjen e Dua Lipës/ Berliner Zeitung: Këngëtarja kritikon qeverinë! Mijëra njerëz protestojnë kundër Ramës
Media gjermane i ka kushtuar një artikull mbështetjes së Dua Lipës për protestat.
“Revolucioni i flamingove në Shqipëri po merr mbështetje të spikatur: Ylli i popit Dua Lipa ka shprehur mbështetjen e saj për protestat disajavore kundër resortit luksoz multi-miliardë dollarësh të Jared Kushner,” shkruan gazeta. Kushner është i martuar me Ivanka Trump, vajza e ish-Presidentit të SHBA-së, Donald Trump.
Kritikat e këngëtares 30-vjeçare drejtohen kryesisht ndaj veprimeve të qeverisë shqiptare. Në dhjetor 2024, parlamenti miratoi ndryshime ligjore që lehtësojnë projektet e ndërtimit në zonat ekologjikisht të ndjeshme.
“Ajo që e gjej vërtet shqetësuese është parimi se qeveria thjesht mund të ndryshojë ligjin për të anashkaluar mbrojtjen e mjedisit pa asnjë konsultim publik,” citohet të ketë thënë Lipa.
Nuk ka prova që Kushner ishte i përfshirë në këto ndryshime ligjore. Sipas platformës së Lipës, Service95, biseda trajtoi gjithashtu se kush përfiton nga zhvillimi ekonomik i Shqipërisë dhe si qytetarët mund të kontrollojnë pushtetin politik.
Demonstratat aktuale konsiderohen si më të rëndësishmet që nga fundi i komunizmit. Protestat filluan në fund të majit, pasi u ngritën gardhe me tela me gjemba dhe u shfaqën mjete ndërtimi në zonën e planifikuar në Zvërnec. Gjatë përleshjeve me forcat private të sigurisë, disa persona u plagosën.
Për më shumë se gjashtë javë, mijëra njerëz kanë protestuar rregullisht kundër projektit dhe qeverisë së kryeministrit Edi Rama.
“`