“`html
Pse protestojnë bankierët
Protesta e bankierëve nuk ka vetëm motive ekonomike. Pas më shumë se 30 vitesh tranzicion, është formuar një shtresë e arsimuar, profesionale dhe ekonomikisht aktive, e cila kërkon më shumë se paga të larta. Ata dëshirojnë një cilësi jetese më të mirë, institucione që funksionojnë, drejtësi, konkurrencë të ndershme dhe respekt për interesin publik.
Të anketuar nga revista “Monitor”, bankierët shprehen në masë dërrmuese në mbështetje të protestave. Nga 150 të pyetur, 88.7% ishin pro protestës, 9.3% e mbështetën pjesërisht, ndërsa vetëm 2% ishin kundër. Mbi 90% mendojnë se protestat duhet të vazhdojnë.
Arsyet kryesore që shtyjnë bankierët të mbështesin protestën, sipas tyre, janë:
- Korrupsioni
- Keqqeverisja dhe mungesa e llogaridhënies
- Mungesa e drejtësisë dhe mosndëshkimi i abuzimeve
- Mungesa e perspektivës për të ardhmen
Të punësuarit në sektorin bankar dhe të sigurimeve kanë dalë në protestë:
- 74% e të anketuarve kanë marrë pjesë në protestë të paktën një ditë.
- 13.3% nuk kanë qenë në protestë, por e mbështesin atë.
- 6% kanë shprehur synimin për t’u bashkuar në të ardhmen.
- Vetëm 6.7% nuk i mbështesin protestat.
Në lidhje me mënyrën se si mund të adresohen këto probleme, bankierët kanë disa propozime:
- Një komentuese nga Tirana, e moshës 50-59 vjeç, e punësuar në sektorin financiar, rekomandon kufizimin e mandatit të kryeministrit në dy. Ajo argumenton se gjatë 36 viteve tranzicion, çdo qeveri e ka trajtuar vendin si pronë private gjatë mandatit të dytë, dhe situata mund të jetë edhe më e keqe në mandatin e tretë.
- Një tjetër person, L.S. nga Tirana, i grupmoshës 50-59 vjeç, propozon formimin e një qeverie teknike, të përbërë nga specialistë të aftë, si nga vendi ashtu edhe nga diaspora, me një proces të qartë llogaridhënieje për zhvillimin e vendit.
- Një bankier 30-39 vjeç, me arsim pasuniversitar, sugjeron që protestuesit të kërkojnë anulimin e ligjeve për zonat e mbrojtura, investimet strategjike dhe paketën e maleve. Ai gjithashtu mendon se duhet ndryshuar Kodi Zgjedhor dhe të mbahen zgjedhje të parakohshme.
Arsyeja kryesore e protestave për punonjësit e sektorit financiar dhe të sigurimeve është e njëjtë me atë të të gjithë të anketuarve: “Revoltë ndaj kapjes së shtetit dhe mosfunksionimit të një shteti demokratik“. E dyta në renditje është “Protestë kundër korrupsionit galopant që evidentohet nga hetimet e BKH/SPAK“, e ndjekur nga “Protestë kundër shkatërrimit të ambientit nga projekte zhvillimi masive dhe betonizimit të bregut të detit“.
Megjithatë, ka edhe nga ata që shprehin skepticizëm. Një bankiere, mbi 60 vjeçe, me arsim pasuniversitar, shprehet: “Nuk besoj se protestat sjellin ndryshim. Protestat shpesh politizohen dhe përdoren për interesa partiake. Problemet duhen zgjidhur përmes institucioneve dhe zgjedhjeve“.
“`