“`html
Gjermania: A është shtëpi për të gjithë qytetarët apo vetëm për gjermanët etnikë? Analisti i DW, Auron Dodi, shpjegon programin e ri të qeverisë për identitetin rajonal.
Në një intervistë për News24, gazetari i Deutsche Welle (DW), Auron Dodi, foli për zhvillimet politike në Gjermani dhe debatin rreth kuptimit të “shtëpisë” në vend.
News24: A kanë të drejtë ta quajnë Gjermaninë “shtëpi” vetëm gjermanët etnikë, apo mund ta quajnë kështu edhe ata që kanë lindur, punojnë dhe jetojnë në Gjermani?
Qeveria gjermane ka nisur një program gjithëpërfshirës për forcimin e kohezionit rajonal dhe kombëtar.
Auron Dodi: Synimi i programit të ri, të iniciuar nga Ministria Federale e Bujqësisë, Ushqimit dhe Identitetit Rajonal, është theksimi i konceptit se Gjermaninë, si “Heimat” (shtëpi), kanë të drejtë ta quajnë jo vetëm personat me origjinë gjermane, por të gjithë ata që kontribuojnë për identitetin rajonal në Gjermani.
Qeveria gjermane nuk e vë theksin te koncepti tradicional i “Vaterland” (atdhe), i orientuar rreth etnisë, por te koncepti më përfshirës dhe modern i “shtëpisë së përbashkët”, “Heimat”. Me këtë kuptohet vendi ose zona, që është ose është bërë “shtëpia” e një personi.
Alois Rainer, Ministri gjerman për Identitetin Rajonal nga CSU, sqaroi këtë çështje. Sipas tij, për qeverinë, “Heimat”, shtëpia jote, krijohet në mënyrë kolektive, kur njerëzit bashkohen në nivel lokal, si në zonat urbane, ashtu edhe në ato rurale. Rëndësi ka individualiteti dhe ndjenja e “shtëpisë së përbashkët” forcohet kur njerëzit kanë mundësinë ta formësojnë vetë atë.
News24: Si po e bën qeveria këtë “shtëpi” më shumë se thjesht një fjalë?
Ministri i Bujqësisë, Ushqimit dhe Identitetit Rajonal paraqiti një “Agjendë për shtëpinë tënde” (Heimat-Agenda) me titullin “Së bashku e bëjmë shtëpinë” (Miteinander ist es Heimat). Ideja kryesore është që shteti të mos vendosë nga lart, por t’u japë hapësirë njerëzve në nivel lokal. Për këtë, qeveria do të pakësojë burokracitë dhe vendimet do të merren aty ku kanë efekt. Mbështetja do të jetë e vazhdueshme, jo e fragmentuar nga projekti në projekt.
Programi mbështetet në tri shtylla:
- Kultura rajonale dhe mënyra e jetesës.
- Bashkëpunimi i fortë.
- Ekonomia e shëndetshme në nivel lokal.
News24: Çfarë do të thotë kjo praktikisht për njerëzit?
Thelbi i programit është dëgjimi i zërave të njerëzve. Formatet quhen “Dialogë për shtëpinë e përbashkët” (Heimat-Dialoge). Përfaqësues të ministrisë do të vizitojnë rajone të Gjermanisë për të pyetur njerëzit se çfarë u mungon. Një sondazh i madh do të mbledhë këto përgjigje. Për më tepër, personat e shquar për angazhimin e tyre në rajone do të nderohen me çmime speciale. Fondet e mbështetjes do të shkojnë për ide të cilat vijnë drejtpërdrejt nga niveli lokal.
Shembull konkret është fshati Serwest në Brandenburg, ku banorët riparuan shkollën e vjetër të braktisur. Tani ajo shërben si pikë takimi për të moshuarit, zjarrfikësit dhe grupin e jogës, ndërsa në katin lart do të hapet së shpejti një ambulancë mjekësore.
News24: Si mund të përfitojë dikush që ka ardhur nga jashtë dhe e quan Gjermaninë “shtëpi” të tij?
Programi trajton çështjen thelbësore të përcaktimit të përkatësisë dhe “Heimat” në një shoqëri të formësuar edhe nga emigracioni. Sipas qeverisë gjermane, programi u drejtohet të gjithëve që jetojnë dhe angazhohen në nivel lokal në Gjermani, pa dallim origjine. Kushdo që jeton këtu dhe kontribuon me punën e tij, bën pjesë në këtë koncept. Ministria e formulon thjesht: mundësi të barabarta, pavarësisht se ku ndihet njeriu “në shtëpi”. Kjo përfshin edhe lagjet e ndryshme me banorë të huaj, si p.sh. Berlin-Neukölln. Kushdo që vjen nga larg dhe ndërton diçka bashkë me të tjerët, është pjesë e konceptit.
Qeveria gjermane pozicionohet qartë. Gazeta Süddeutsche Zeitung shkroi për një “front me emrin shtëpia jote (Heimat)”, duke theksuar se jo të gjithë e kuptojnë fjalën “Heimat” në mënyrë aq të gjerë. Edhe forcat ultra-të djathta përdorin termin “Heimat”, por me kuptime të ndryshme.
News24: Sa efekt praktik ka kjo?
Në një vend të formësuar nga emigrantët, pyetja se kush ka të drejtën ta quajë vendin “shtëpi” është e rëndësishme për qëndrimin ndaj njerëzve dhe frymën ndaj banorëve.
Kur u prezantua programi, Ministri gjerman për Identitetin Rajonal Rainer u pyet për partinë ultra-të djathtë AfD, e cila përdor gjithashtu konceptin “Heimat”, por me një kuptim tjetër. Ai u shpreh se për qeverinë, “Heimat” nuk është një term i mbrojtur. “Heimat (shtëpia e përbashkët),” tha ministri gjerman, “është e atyre që kujdesen për bashkëjetesën, jo atyre që i vënë njerëzit kundër njëri-tjetrit.” Ai shtoi se Gjermanisë i duhen njerëz që japin shpresë dhe guxim, jo ata që nxijnë gjithçka.
News24: Çfarë duhet të ndodhë për qëllimin të japë fryte?
Përgjigjja varet nga vetë vendet ku jetojnë njerëzit. Agjenda është lënë me qëllim e hapur për t’u zhvilluar më tej, duke dëgjuar njerëzit dhe duke regjistruar idetë e tyre. Nuk është gjithmonë e lehtë. Në fshatrat, ku jetojnë 57% e banorëve të Gjermanisë, shpesh mungojnë mjekët ose shkollat, dhe shumë të rinj largohen. Pikërisht këtë boshllëk kërkon të mbushë programi. Skema e financimit mbështet idetë që burojnë drejtpërdrejt nga zonat rurale. Ka mjaft njerëz që angazhohen vullnetarisht për rajonin e tyre, duke dhënë shpresë.
“`