“`html
Me pranga dhe libër në duar, Veliaj paraqitet në Gjykatën Administrative, akuzon prokurorin: Nëse më arrestuan mua, mund ta bëjnë me këdo
TIRANË – Kryebashkiaku i Tiranës, Erion Veliaj, i cili prej më shumë se një viti ndodhet nën masën e arrestit, u paraqit këtë të premte në Gjykatën Administrative. Aty po shqyrtohet padia me të cilën kërkohet anulimi i dekretit të emërimit të Ols Dados si prokuror.
Gjatë seancës, Veliaj deklaroi se në proces po krijohet një trajtim i pabarabartë mes palëve. Ai po ashtu theksoi se mandati i kryebashkiakut nuk mund të trajtohet si plaçkë.
Duke iu referuar prokurorit Ols Dado, Veliaj theksoi se një noter është emëruar në kundërshtim me ligjin.
“Është evidente që po krijohet asimetri. Një pale po i shtohet interesi publik, ndërsa palëve të paditura po u largohen të tjerët, si KLP dhe avokati i shtetit. Ose KLP nuk tregon respekt për këtë gjykatë, ose ka kuptuar atë që di gjithë Shqipëria: që Ols Dado nuk është prokuror dhe kryebashkiaku është arrestuar. Mandati i kryetarit të bashkisë nuk mund të trajtohet si plaçkë. Dikush ka veshur uniformën e shtetit dhe më ka rrëmbyer nga zyra. Ju si shoqatë e legjitimuar, keni peshën për të rikthyer besimin te drejtësia. Nëse dikush mund të vishet si polic apo si prokuror në këtë teatër, merr në qafë një qytet të tërë. Unë dy fitore i kam marrë edhe pa shkuar në Strasburg. Nëse më rrëmbyen mua, mund të rrëmbejnë këdo tjetër. Kjo vlen edhe për një noter që është emëruar në kundërshtim me ligjin”, tha Veliaj.
Mbrojtja e Veliajt u shpreh lidhur me kërkesën e “Asociacionit Kombëtar të Medias dhe Drejtësisë”, i cili kërkoi të pranohej si palë në gjykimin e nisur nga Erion Veliaj. Në sallë mungonin Këshilli i Lartë i Prokurorisë dhe Avokatura e Shtetit.
Qëndrimet në seancë
Plerent Ndreca: Kodi i Procedurës Civile parashikon se kushdo mund të ndërhyjë si palë në një proces gjyqësor nëse ka interes për të hyrë në proces. Në rastin konkret, shoqata ka interes për përfundimin e këtij gjykimi, që lidhet drejtpërdrejt me interesat e shoqatës. Shoqata ka identifikuar pse përfundimi i gjykimit lidhet me interesin e saj. Kërkesa e shoqatës për ndërhyrje kryesore në gjykim duhet të pranohet.
Veliaj: Është evidente që po krijohet asimetri. Njërës palë po i shtohen palët, ndërsa të paditurit po i largohen. Tek njëra palë shtohen aktorët që kanë interes publik, ndërsa palës tjetër po i reduktohen. Për 540 ditë, kryetari i bashkisë është larguar nga detyra e tij dhe nga familja e tij, nga një njeri që ka veshur uniformën e shtetit, por që nuk ka tagrin dhe më ka rrëmbyer nga detyra. Pesha juaj, i nderuar gjyqtar, është për të rikthyer besimin e qytetarëve te drejtësia. Unë dy beteja i fitova në Gjykatën Kushtetuese, pa shkuar ende në Strasburg. Një noter që nuk ka bërë magjistraturën, nuk mund të jetë prokuror. Ky nuk është më një vend qokash. Dikush nuk mund të veshë uniformën e dikujt tjetër dhe të ushtrojë një funksion të caktuar. Kushdo palë që tregon interes kontribuon në këtë gjykim. Është pesha e këtij gjykimi që do të rikthejë besimin te drejtësia. I mungoj shumë familjes sime në ditët më të vështira, i mungoj edhe bashkisë sime, që e lashë ndryshe. Kushdo palë që tregon interes, kontribuon në këtë gjykim. Do t’ju kërkoja që të pranohet shoqata.
“`