Doganat referojnë në SPAK skemën e dyshuar me dokumente të falsifikuara që prek interesat e BE-së
Doganat Shqiptare kanë referuar në Prokurorinë e Posaçme (SPAK) një çështje që ka të bëjë me përdorimin e dokumenteve të falsifikuara. Këto dokumente, të paraqitura si të lëshuara nga autoritetet shqiptare, janë përdorur për të kryer operacione fiktive zhdoganimore dhe eksporti nga vendet e Bashkimit Europian.
Drejtori i Përgjithshëm i Doganave, Besmir Beja, ka deklaruar se në këtë skemë janë përdorur materiale të ngjashme me ato zyrtare të administratës doganore shqiptare. Për shkak të kësaj ngjashmërie, çështja është referuar në SPAK.
Ndërkohë, për këtë rast është njoftuar edhe Zyra Europiane Kundër Mashtrimit (OLAF). Ky njoftim synon hetimin dhe goditjen e kësaj veprimtarie, e cila cenon kryesisht interesat financiare të Bashkimit Europian.
Beja ka shtuar se gjatë kësaj periudhe, Dogana Shqiptare ka publikuar disa raste të goditjes së paligjshmërisë në Portin e Durrësit, Aeroportin Ndërkombëtar të Tiranës dhe në degë të tjera doganore. Këto raste janë evidentuar në bashkëpunim me Policinë e Shtetit dhe kanë përfshirë shkelje në fushën doganore, si dhe raste të lidhura me trafikimin e mundshëm të lëndëve narkotike.
“Kemi parandaluar dhe goditur jo vetëm shkeljet në fushën doganore, por edhe raste që lidhen me trafikimin e mundshëm të lëndëve narkotike,” ka theksuar ai.
Ai ka sqaruar se në çdo rast janë kryer referimet përkatëse pranë organeve kompetente, si në prokuroritë e juridiksionit të përgjithshëm, ashtu edhe në Prokurorinë e Posaçme (SPAK), sipas kompetencës.