‘’Vetë Zot, vetë shkop’’/ Rama reagon sërish për pagat e gjyqtarëve: Është gati 2 mijë euro më e lartë se ajo e Presidentit, situatë shqetësuese, e shëmtuar dhe vulgare
Kryeministri Edi Rama ka reaguar sërish lidhur me debatin për pagat e magjistratëve, këtë herë përmes një lidhjeje direkte në “Facebook”, pas komenteve të publikuara në platformën “X”. Rama e ka cilësuar si “shqetësuese”, “të shëmtuar” dhe “vulgare” atmosferën e krijuar nga përplasja mes pushteteve lidhur me pagat e gjyqtarëve dhe prokurorëve.
Duke iu referuar strukturave drejtuese të sistemit të drejtësisë, kryeministri ka kritikuar mënyrën se si është ndjekur procesi për përcaktimin e pagave, duke argumentuar se para marrjes së vendimeve duhej të kishte një proces dialogu dhe konsultimi. Sipas Ramës, çështja e pagave duhej të trajtohej përmes komunikimit institucional dhe jo përmes përplasjeve mes institucioneve.
Kryeministri ka theksuar gjithashtu se vendimi lidhur me pagat nuk mund të shërbejë si shembull për mënyrën se si duhet kërkuar e drejta, duke shprehur kritika për mënyrën e ndjekur në këtë proces.
Rama argumenton se paga mesatare e gjyqtarëve në Shqipëri është aktualisht 280% më e lartë se paga mesatare në administratën shtetërore, ndërsa sipas tij është 60% më e lartë se paga mesatare e kolegëve në Malin e Zi dhe Maqedoninë e Veriut. Ai shton se pagat e gjyqtarëve shqiptarë janë gjithashtu më të larta se ato në Kroaci, Bullgari dhe Serbi.
Në “X” ai shtoi se me rritjen e bërë nga vetë magjistratët, paga e gjyqtarit bëhet 2000 euro më e lartë se ajo e Presidentit të Republikës dhe 3000 euro më e lartë se ajo e ministrit.
“Me rritjen e kërkuar me llogarinë ‘vetë Zot vetë Shkop’, paga mesatare e gjyqtarëve bëhet më e lartë se në Greqi, Rumani e Slloveni dhe 140% më e lartë se në Mal të Zi dhe Maqedoninë e Veriut, ndërsa në raport me administratën shqiptare ajo kërcen në 470% më lart… Dhe nëse në të gjitha vendet e tjera të rajonit, Europës dhe botës demokratike maja e piramidës së pagave në shtet është Presidenti, paga mesatare e rritur në rrugën jashtë parlamentit bëhet 1,000 euro më e lartë se paga e Presidentit dhe 2,200 euro më e lartë se paga e ministrit. Po të marrësh nivelin më të lartë të pagës në sistemin gjyqësor sot, ajo aktualisht është gati 2000 Euro më shumë se e Presidentit dhe 3000 Euro më e lartë se e ministrit, po bashkë me rritjen e kërkuar e dini sa shkon?!”, shkroi Rama.
Pjesë nga fjala e Ramës në lidhjen direkte në Facebook:
“Dua të them se sa shqetësuese, se sa e shëmtuar, se sa vulgare është atmosfera e krijuar nga një konflikt pushtetesh dhe nga një barrikadim i atij pushteti të pavarur kushtetues, që duhet të garantojë barazinë para ligjit për të gjithë dhe mbi të gjitha për vetveten. Mbi të gjitha, përtej gërmës së ligjit, të garantojë një shembull kur vjen puna që del nga salla e gjyqit dhe është i organizuar në shoqata për t’i dhënë zë trupës në publik. Këtu flasim për një tjetër dimension. Ky dimension është shumë i rëndësishëm për shembullin që jepet. Unë nuk dua ta nis nga gjykatat, nga gjykatësit dhe prokurorët, të cilët nuk e di sa janë në të drejtën e tyre që të kërkojnë edhe më shumë nga taksapaguesit, por le të themi që janë një palë që kanë këtë interes. Dua t’ia nis nga aty ku e fillova, nga këto dy trupa këshillash. Janë një majë me dy trupa e piramidës së sistemit gjyqësor. Tani këta burra dhe gra që paguhen jo pak, janë për të administruar proceset gjyqësore. Tani janë në pavarësinë e tyre të plotë. Po si mundet që gjëja e parë që bëjnë, u kuturisën të marrin një vendim në mes të verës dhe të nxjerrin një urdhër që është zanafilla e këtij konflikti absurd. Urdhri që pagat janë këto dhe Thesari i Shtetit të hapë derën që gjyqtarët të marrin pagat. Le të themi që gjykatësit kanë të drejtë, por kjo është mënyra? Ky është shembulli? Këtë i mësojnë njerëzit e drejtësisë qytetarëve shqiptarë? Kështu kërkohet e drejta? Me dhunë? Pa ezauruar asnjë nga hapat e tjerë? Po ku jemi ne këtu? Ne jemi përfaqësuesit e Republikës së Shqipërisë, apo jemi tre shtete?! Janë republikat e ndara të një federate nga luftërat etnike dhe fetare?! Si është e mundur që nuk hidhet hapi i parë normal?! Ulen njerëzit në tavolinë, njerëzit që jetojnë me përgjegjësinë e një shteti. Që jetojnë me përgjegjësinë e dhënies së shembullit për të tjerët. Ne kemi këtë shqetësim. Ka një vendim të Gjykatës Kushtetuese dhe ne si pushtet ekzekutiv dhe legjislativ, nuk kemi asnjë qëllim që mos ta respektojmë. Si e keni ju këtë ide? Pasi të dëgjonit anën tonë, pastaj të fillonin të bënin të tyren. Kështu, me arbitraritet, ndaj një shumice qeverisëse për këtë standard mirëqenieje që është rritur kaq ndjeshëm, në familjen e gjithë kësaj trupe, gjëja e parë që i erdhi në mendje ishte ta sfidonin, vetë Zot, vetë shkop. Çfarë jeni ju?! Partia e çekanëve?! Për të kërcënuar ministrin e Financave? Për të kërcënuar përfaqësuesit e thesarit të Republikës së Shqipërisë? Si është e mundur që nuk ka një moment marrje fryme dhe marrje me arsye të hapave. Ne mund të mos jemi dakord, por e trajtojmë me hapat e duhur. Hajde se ka para thesari i shtetit të marrim ne tonat dhe punë e madhe ca bëhet me të tjerë. Kështu që besoj që ky është një rast për të nxjerrë mësime. Dhe siguroj dhe njëherë të gjithë që do ta respektojmë vendimin e Kushtetueses dhe do të bëjmë atë që është sipas nesh rruga për t’iu përgjigjur edhe kësaj kërkese. Por kërcënime dhe të pushteteve të tjera të pavarura siç janë pushteti ekzekutiv dhe legjislativ, askush nuk duhet të bëjë”, tha ndër të tjera Rama.
Gushti dhe shtatori kanë qenë muaj ‘të nxehtë’ pas përplasjes mes magjistratëve dhe ekzekutivit. Këshilli i Lartë i Prokurorisë dhe Këshilli i Lartë Gjyqësor miratuan pagat e reja për veten, nisur kjo nga vendimi i Gjykatës Kushtetuese dhe vakanca ligjore e lënë bosh nga Kuvendi, teksa Ministria e Financave ka bllokuar në Thesar pagat për magjistratët dhe administratën e gjykatave dhe prokurorive. Pas ‘mbylljes’ të pagave, Gjyqtarët kanë denoncuar në SPAK ministrin e Financave, Petrit Malaj, ndërsa Administrativja ka urdhëruar kalimin e pagave me formulën e re të miratuar nga KLP dhe KLGJ. Bllokimi i pagave ka bërë që shumë gjykata në vend të bojkotojnë seancat në shenjë revolte.
Sot paga mesatare e gjyqtarëve në Shqipëri është:
- 280% më e lartë se paga mesatare e administratës shtetërore;
- 60% më e lartë se paga mesatare e kolegëve magjistratë në Malin e Zi dhe Maqedoninë e Veriut;
- më e lartë se në Kroaci, Bullgari apo Serbi…
Me rritjen e kërkuar me…