“`html
A ka krisje brenda lidershipit në Teheran? Presidenti iranian hedh poshtë zërat për dorëheqje
Presidenti iranian, Masud Pezeshkian, ka deklaruar në një video të publikuar nga disa agjenci iraniane të lajmeve se nuk ka ndërmend të japë dorëheqje, duke hedhur poshtë spekulimet që qarkullojnë prej disa javësh për të ardhmen e tij politike.
Në video, Pezeshkian u shpreh se në rast se do të merrte ndonjëherë vendimin për t’u larguar nga posti, ai do ta njoftonte zyrtarisht. “Për momentin, do të qëndroj i vendosur,” theksoi ai.
Presidenti iranian hodhi poshtë gjithashtu spekulimet për një përçarje mes tij dhe liderit suprem të Iranit, ajatollah Mojtaba Khamenei, duke shtuar: “Ata duan të krijojnë përshtypjen se ka një mosmarrëveshje. Lideri thotë një gjë, ndërsa ata pretendojnë se unë them diçka tjetër.”
Videoja, e titulluar “Raport për popullin”, pritet të publikohet e plotë në ditët në vijim.
Që nga raportimi për vrasjen e ish-liderit suprem, ajatollah Ali Khamenei, gjatë sulmeve të SHBA-Izrael më 28 shkurt, dhe njoftimi për pasardhësin e tij – djalin e tij – kanë qarkulluar raporte të pakonfirmuara se Pezeshkian po përgatitej të jepte dorëheqje.
Kohët e fundit, Mohammad Baqer Kharazi, sekretar i përgjithshëm i partisë Hezbollah në Iran dhe kunati i Masud Khameneit, një tjetër djalë i Ali Khameneit, pretendoi se Mojtaba Khamenei kishte “paralajmëruar zyrtarisht dhe publikisht” se nëse Pezeshkian do të paraqiste një kërkesë tjetër për dorëheqje, ajo do të pranohej. Kharazi nuk sqaroi se kur dhe kujt ia kishte bërë gjoja këtë paralajmërim lideri suprem.
Mojtaba Khamenei nuk është shfaqur në publik që kur u njoftua si pasardhës i babait të tij. Përveç disa deklaratave me shkrim që i atribuohen atij, nuk janë publikuar video apo audio të verifikuara të tij./ REL
“`