Një katastrofë e mundshme u shmang në Aeroportin e Leipzigut, ku u kap një dron me eksploziv pranë një avioni ukrainas.
Një incident serio sigurie në Aeroportin e Leipzigut, Gjermani, ka ngritur alarmin mes autoriteteve, pasi pranë një avioni transportues ukrainas u gjet një dron i pajisur me një pajisje shpërthyese. Sipas mediave gjermane, rasti po hetohet si një tentativë e mundshme sulmi.
Sipas raportimeve të Süddeutsche Zeitung, NDR dhe WDR, të cilat citojnë një raport konfidencial të policisë gjermane, avioni ukrainas Antonov kishte transportuar më parë municione ushtarake nga Franca drejt Leipzigut dhe po përgatitej të vazhdonte misionin e tij.
Droni u zbulua të martën në mbrëmje. Hetimet paraprake mjeko-ligjore tregojnë se ai ishte i pajisur me një sasi eksplozivi me fuqi të lartë, dyshohet të jetë Semtex, një lëndë shpërthyese e përdorur si në ushtri ashtu edhe në industri. Autoritetet raportojnë se eksplozivi ishte vendosur në një pako me madhësinë e një grushti dhe ishte i lidhur me dronin.
Piroteknikët e Shërbimit Shtetëror të Hetimit Penal të Saksonisë arritën të çaktivizonin detonatorin, duke mundësuar dërgimin e pajisjes për analiza të mëtejshme laboratorike. Raporti i policisë thekson se në orën 23:42 punonjësit e aeroportit panë dronin duke fluturuar mes dy avionëve transportues të Antonov Airlines, linja ajrore shtetërore ukrainase. Gjatë incidentit, droni thuhet se pati kontakt me një punonjës të aeroportit përpara se të binte në tokë.
Deri më tani, autori ose grupi i mundshëm pas incidentit nuk janë identifikuar.
Alarm për sigurinë
Aeroporti i Leipzigut konsiderohet një qendër strategjike për transportin ushtarak të NATO-s dhe përdoret rregullisht edhe nga avionët transportues ukrainas. Sipas informacioneve të publikuara, sistemi i zbulimit dhe reagimit ndaj dronëve nuk arriti ta identifikonte pajisjen.
Ministri i Brendshëm gjerman, Alexander Dobrindt, deklaroi se droni mund të jetë modifikuar për t’iu shmangur sistemeve ekzistuese të mbrojtjes. Ai e cilësoi incidentin si një “nivel të ri kërcënimi” dhe foli për një “skenar të mundshëm sulmi hibrid”.
Dyshime për përfshirje të huaj
Edhe pse ministri nuk përmendi drejtpërdrejt Rusinë, media Bild raportoi se deklaratat e tij u interpretuan si një referencë indirekte ndaj Moskës. Eksperti gjerman i sigurisë, Peter Neumann, tha se termat e përdorur nga ministri, si “forca të huaja”, “profesionistë” dhe “kërcënim hibrid”, zakonisht lidhen me doktrinën ruse të luftës hibride.
Megjithatë, deri në këtë fazë të hetimeve, autoritetet gjermane nuk kanë paraqitur prova publike që lidhin incidentin me ndonjë shtet apo organizatë të caktuar, ndërsa hetimet vazhdojnë.