Synonin të diskreditonin Suedinë, NATO-n dhe BE-në
Shërbimi Suedez i Sigurisë (Säpo) ka bërë të ditur se ka penguar një operacion të inteligjencës ruse. Ky operacion synonte të diskreditonte Suedinë dhe përfshinte një “agjent” që vepronte në kuadër të një misioni diplomatik të huaj në vend.
Agjencia kundër-spiunazh deklaroi se ka mbledhur informacione dhe ka ndërmarrë masa kundër një operacioni të inteligjencës ruse, i cili kishte për qëllim të ndikonte në vendimmarrjen suedeze dhe të dëmtonte imazhin e Suedisë, NATO-s dhe BE-së.
Sipas Säpo-s, ky operacion i inteligjencës është planifikuar dhe drejtuar për një periudhë kohore nga shërbimi i inteligjencës së jashtme ruse, SVR. Misioni diplomatik ku punonte agjenti i dyshuar i përfshirë nuk u identifikua.
Një nga qëllimet kryesore të operacionit, sipas Säpo, ishte mbledhja e informacionit rreth procesit të vendimmarrjes në Suedi. Kjo do t’u mundësonte shërbimeve ruse të inteligjencës të kryenin operacione ndikimi lidhur me çështje polarizuese, me qëllim minimin e vendimmarrjes suedeze dhe diskreditimin e Suedisë, NATO-s dhe BE-së.
Christoffer Wedelin, zëvendësdrejtori i operacioneve të Säpo-s, theksoi se pasi u informuan për operacionin, “Shërbimi Suedez i Sigurisë ndërmori veprime për të mbrojtur asetet jetësore suedeze dhe për të kundërshtuar ndikimin e vazhdueshëm”.
Në vitin 2024, Suedia i dha fund dy shekujve të neutralitetit ushtarak dhe iu bashkua NATO-s, pas pushtimit të plotë të Ukrainës nga Rusia në vitin 2022. Säpo e ka përmendur vazhdimisht Rusinë, së bashku me Kinën dhe Iranin, si kërcënime kryesore të inteligjencës për vendin.