“`html
Inceneratori i pa-ndërtuar i Tiranës, kompania nën sekuestro me fitim 8 milionë euro në 2025
“Integrated Energy BV SPV”, shoqëria koncesionare e incineratorit të Tiranës, raportoi një fitim para taksave prej 792.3 milionë lekësh (mbi 8 milionë euro) për vitin 2025, pavarësisht se impianti për djegien e mbetjeve, për të cilin u lidh kontrata, nuk është ndërtuar ende.
Sipas pasqyrave financiare të vitit 2025, të ardhurat nga aktiviteti kryesor arritën në 1.5 miliardë lekë. Kompania sqaron se këto të ardhura vijnë nga përpunimi i mbetjeve të pranuara dhe trajtuara nga bashkitë e qarkut dhe operatorë privatë me kontratë. Gjatë vitit 2025, sasia e trajtuar ishte rreth 492,935 ton, sipas të dhënave zyrtare.
Fitimi para tatimit përbënte rreth 53% të të ardhurave, duke treguar një normë jashtëzakonisht të lartë për një kontratë të financuar kryesisht nga pagesa publike për trajtimin e mbetjeve. Pas pagesës së 119.6 milionë lekëve tatim, “Integrated Energy BV SPV” e mbylli vitin 2025 me një fitim neto prej 672.8 milionë lekësh, gati 7 milionë euro.
Koncesioni i mbetjeve në Tiranë ka marrë rregullisht pagesa nga buxheti i shtetit, edhe pasi u vu në sekuestro dhe përkundër faktit se kryen vetëm shërbimin e menaxhimit të mbetjeve, pa përmbushur investimin për ndërtimin e incineratorit. Në vitin 2025, shoqëria mori 913 milionë lekë pagesa nga buxheti, ndërsa që nga viti 2017 ka marrë gjithsej 8.4 miliardë lekë.
Rezultatet financiare marrin një peshë tjetër duke marrë parasysh historinë e kontratës dhe hetimet penale. Koncesioni, me vlerë të parashikuar investimi prej 128.2 milionë eurosh pa TVSH, u dha në vitin 2017 për ndërtimin e landfillit, incineratorit, rehabilitimin e vend-depozitimeve ekzistuese dhe prodhimin e energjisë elektrike. Megjithatë, impianti industrial i incinerimit nuk u ndërtua.
Kontrolli i Lartë i Shtetit kishte konstatuar më parë se Bashkia e Tiranës dhe institucionet shtetërore paguanin tarifën e plotë prej 29 eurosh për ton, edhe pse ajo përfshinte procesin e incenerimit, i cili nuk kryhej.
Shoqëria ndodhet nën sekuestro preventive që prej korrikut 2023 dhe administrohet nga shteti. Sipas SPAK-ut, pronarët “de facto” të saj janë Mirel Mërtiri dhe Klodian Zoto, pavarësisht strukturës formale të pronësisë së regjistruar jashtë vendit. Në korrik 2026, SPAK dërgoi për gjykim 12 persona dhe dy shoqëritë “Integrated Energy BV SPV” dhe “Integrated Technology Service”.
Vetë kompania koncesionare akuzohet për mashtrim me pasoja të rënda dhe pastrim të produkteve të veprës penale. Sipas SPAK-ut, nga fillimi i kontratës deri në vendosjen e sekuestros në vitin 2023, kompania siguroi 11.3 miliardë lekë të ardhura, ndërsa për ndërtimin e veprës u investuan vetëm 21 milionë euro.
Prokuroria pretendon se shuma të mëdha u nxorën nga llogaritë përmes faturave fiktive, kompanive të krijuara brenda dhe jashtë Shqipërisë dhe transfertave në para fizike. Vlera e identifikuar nga hetimi arrin në 1.28 miliardë lekë dhe 16.7 milionë euro.
Norma prej 53% e fitimit para taksave tregon se kontrata vijon të prodhojë fitime të mëdha, ndërsa vepra kryesore që duhet të justifikonte tarifën dhe investimin publik, incineratori, nuk është ndërtuar ende, 9 vjet pas hyrjes në fuqi të kontratës.
“`