Kadastra: Si të regjistroni pronësinë e shtëpive para ’91

Kadastra: Hapat për regjistrimin e pronësisë së shtëpive të ndërtuara para vitit ’91

Qytetarët që kanë marrë vendimin për kalimin në pronësi të shtëpive të vjetra të ndërtuara para vitit 1991, oborreve në përdorim apo trojeve funksionale, mund ta regjistrojnë atë përmes portalit e-Albania.

Agjencia Shtetërore e Kadastrës ka publikuar një përmbledhje të detajuar të hapave që duhet të ndiqen për këtë proces. Sipas Kadastrës, përmes kësaj procedure, qytetarët mund të pajisen me dokumentacionin e plotë të pronësisë për shtëpinë e tyre.

Procedura e aplikimit:

• Fillimisht, qytetari duhet të hyjë në llogarinë e tij në portalin e-Albania.
• Më pas, duhet të zgjedhë shërbimin “Aplikim për regjistrimin e kalimit të pronësisë me anë të ligjit, me vendim të gjykatës, apo të një akti administrativ” dhe të klikojë opsionin “Përdor”.
• Pas hapjes së shërbimit, aplikanti duhet të krijojë një aplikim të ri dhe të plotësojë fushat e nevojshme të kërkuara në portal.
• Në vijim, duhet të zgjidhet nënshërbimi “Regjistrim i kalimit të pronësisë me anë të aktit administrativ të lëshuar nga ASHK”.

Sipas njoftimit, pas zgjedhjes së këtij nënshërbimi, sistemi shton automatikisht edhe shërbimin për lëshimin e certifikatës së pronësisë, kopjen e kartelës së pasurisë së paluajtshme dhe kopjen e fragmentit të hartës kadastrale.

Pasi aplikimi plotësohet, qytetari duhet ta dërgojë atë, të shkarkojë mandatin dhe të kryejë pagesën. Pagesa mund të realizohet online, pranë Postës Shqiptare ose në çdo bankë të nivelit të dytë.

Agjencia Shtetërore e Kadastrës ka njoftuar qytetarët se informacioni mbi dokumentacionin e nevojshëm gjatë aplikimit për shërbimet kadastrale mund të gjendet në faqen e saj të internetit, në rubrikën “Shërbime”.