VIDEO/ Momente paniku! Turistët përfshihen nga ujërat e rrëmbyeshëm, shpëtohen në momentin e fundit
Momente paniku janë regjistruar në ujëvarën Mae Sa, në provincën Chiang Mai të Tajlandës, pasi një përmbytje e papritur shkaktoi një rrjedhë të fuqishme uji që përfshiu një grup turistësh. Ngjarja ndodhi më 15 gusht, kur vizitorët ndodheshin mbi shkëmbinjtë në shtratin e ujëvarës.
Një video e filmuar nga dëshmitarët dhe e publikuar në rrjetet sociale tregon turistët teksa përpiqen të qëndrojnë në këmbë dhe të ndihmojnë njëri-tjetrin për t’i shpëtuar rrjedhës së fortë.
Sipas raportimeve, autoritetet e parkut ndërhynë menjëherë dhe arritën t’i evakuonin turistët në mënyrë të sigurt. Vizitorët pësuan vetëm lëndime dhe gërvishtje të lehta, për të cilat morën ndihmën e parë.
Një dëshmitar tha se pak sekonda përpara se niveli dhe shpejtësia e ujit të ndryshonin papritur, kishte dëgjuar një fishkëllimë paralajmëruese nga një punonjës i parkut. Ai tregoi se po përgatitej t’i afrohej ujëvarës për të bërë fotografi kur rrjedha e ujit u fuqizua papritur, duke i zënë turistët në befasi.
Pamjet tregojnë momentet e frikës, ndërsa turistët përpiqen të ruajnë ekuilibrin mbi shkëmbinjtë e lagësht dhe të largohen nga rrjedha e fuqishme.
Pas incidentit, autoritetet vendosën të kufizojnë përkohësisht aksesin në ujëvarën Mae Sa, si masë sigurie për vizitorët.
Ngjarja ka rikthyer vëmendjen mbi rrezikun e përmbytjeve të menjëhershme në zonat malore dhe pranë ujëvarave, ku ndryshimet e shpejta të reshjeve mund të shkaktojnë rritje të menjëhershme të prurjeve.