Mbrojtje kundër dronëve: Kryeministri Tusk deklaron se kufiri lindor i Polonisë është më i sigurt se kurrë.
Polonia është “më e sigurt se kurrë më parë” në kufirin e saj lindor, deklaroi kryeministri Donald Tusk. Ai theksoi se projekti “Eastern Shield” (Mburoja Lindore), i cili synon forcimin e kufirit lindor të Polonisë me Rusinë dhe Bjellorusinë, po luan një rol kyç.
Në kuadër të këtij projekti, janë ndërtuar barriera antitank dhe pengesa prej betoni, si dhe janë vendosur sisteme mbikëqyrjeje dhe mbrojtjeje kundër dronëve. Varshava po punon gjithashtu për rritjen e kapaciteteve të saj të mbrojtjes ajrore.
Bashkimi Evropian po kontribuon në financimin e projektit përmes programit SAFE, një instrument financiar i krijuar në vitin 2025 për të ndihmuar vendet e BE-së të forcojnë kapacitetet e tyre mbrojtëse përmes prokurimeve të përbashkëta. Gjithashtu, inxhinierë nga ushtria gjermane, Bundeswehr, po mbështesin projektin e mbrojtjes.
“Ndërtimi i Mburojës Lindore nuk do të përfundojë kurrë, sepse një komponent shumë i rëndësishëm është modernizimi i vazhdueshëm i mbrojtjes ajrore”, tha Tusk. “Jemi vetëm në fillim të këtij rrugëtimi”, shtoi ai.